Қазақстан банктерінің бірі былтыр көрші елден түскен 7 триллион теңгені ($14 млрд) өзінен өткізіп, басқа елдерге аударып жіберген.
Деректі президент Тоқаевтың өзі жария етті, деп хабарлайды Ertenmedia.kz.
«Мұндай оқиға қарапайым операция емес, мемлекеттің қаржы жүйесіне төнген қауіп. Бір банк арқылы көрші елдің қыруар қаражатын басқа мемлекеттерге жіберу заң жағынан да, экономикалық тұрғыдан да, тіпті саяси тұрғыдан да барып тұрған сорақылық», – деді Мемлекет басшысы Қаржы мониториң агенттігіндегі жиында.
Президентке әлгі ақпаратты агенттік төрағасы Жанат Елиманов жеткізген екен. Айтуынша, банктердің бірі арқылы сырт елден Қазақстанға әдейі қомақты ақша енгізілген, бірақ ақша елімізде қалмай, дереу басқа мемлекеттерге шығарылған. Мамандар мұны «қаржылық транзит» деп атайды.
Президенттің пікірінше, мұндай көлемдегі транзакция мемлекеттің бақылауынан тыс жүруі мүмкін емес. Яғни, бұл жерде банктің де, бақылаушы органдардың да кемшілігі бары анық.
«Мемлекеттің есебінсіз, бақылаусыз миллиардтаған доллардың елден ары-бері өтуі ашық ұрлықтың белгісі. Көрші елдің қаражатын Қазақстан арқылы өткізіп, заңсыз жолмен басқа жаққа аудару ешбір қисынға сыймайды. Бұл ұлт қауіпсіздігіне төнген қауіп», – деп қатаң сынға алды Тоқаев.
Тоқаев айтқан көрші ел кім?
Президент осы оқиғаға байланысты қаржыны қадағалау органдары мен Ұлттық банкке коммерциялық банктердің күмәнді операциясын қатаң тексеруді тапсырды.
Бұған қоса, заңсыз қаржыны жасырған компаниялардың жауапкершілігін арттыру мен заңсыз табылған мүлікті мемлекет меншігіне қайтару мәселесін қарауды жүктеді.
Қарапайым тілмен айтқанда, Қазақстанның бір банкі көрші мемлекеттің ақшасын жасырып, оны басқа елдерге аудару үшін құрал ретінде пайдаланылған. Билік банкті және соған қатысы бар ұйымдарды анықтап, жауапқа тартуды көздеп отыр.
Сарапшылар өз кезегінде Тоқаев атын айтпаған ел Ресей болуы мүмкін деп топшылайды. Кремльге қарсы санкция күшейген соң, ресейлік компаниялар мен жеке тұлғалар Қазақстанның банк жүйесін белсенді пайдаланып жатқанын жазғанбыз.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
