Transparency International «Сыбайлас жемқорлықты қабылдау индексі» халықаралық рейтингінде 2024 жылы Қазақстанның нәтижелері жақсарған, — деп хабарлайды ErtenMedia.
Мәліметті Антикор жариялады.
«Еліміз 40 ұпай жинап, 180 ел арасында 5 орынға көтерілді (88-орын). Бұл — сыбайлас жемқорлыққа қарсы кешенді шаралардың арқасында қол жеткізілген жаңа тарихи көрсеткіш», — деп жазылған хабарламада.
Әлем бойынша орташа балл — 43, ал Шығыс Еуропа және Орталық Азия аймағында (19 ел) 35 болды.
Қазақстан рейтингі 2016 жылдан бастап айтарлықтай өскен ел ретінде атап өтілді: 11 баллға (29 баллдан) өскен.
«Орталық Азия өңірі елдерінің ішінде Қазақстан ең жоғары позицияны иеленеді және рейтингті жақсартқан жалғыз ел. Индексте Қазақстаннан кейін Үндістан (38), Индонезия (37), Аргентина (37), Сербия (35), Украина (35), Бразилия (34), Таиланд (34), Түркия (34), Беларусь (33), Ресей (22) және т.б. елдер орналасқан», — деп жазылған хабарламада.
Жемқорлықты қабылдау индексі — Қазақстанның рейтингін шығару үшін 9 түрлі ұйымның деректері пайдаланылған композиттік индекс. Рейтинг мемлекеттік сектордағы сыбайлас жемқорлықты қабылдаудың сараптамалық және бизнес бағалауларына негізделген.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
