Танымал журналист Ербол Мәндібек белгілі әнші Мейрамбек Беспаевқа қатысты ел естімеген әсерлі әңгімесімен бөлісті, деп жазады Ertenmedia.kz.
Автордың сөзінше, ол бұл оқиғаны бір отырыста естіген. Шай үстінде YouTube-тен караоке қосылып, жұрт ән айтып отырған кезде араларындағы бір жігіт ауылында болған ескі әңгімені айтып берген. Сол жігіттің айтуынша, олардың ауылында Мейрамбек Беспаевтан 3-4 жас кіші бір қыз болыпты. Туа бітті талма дертіне шалдыққан екен. Әкесі қызын емдетемін деп талай жерге апарғанымен, нақты нәтиже шықпаған.
Ербол Мәндібектің жеткізуінше, 2000 жылдары Мейрамбек МузАрт құрамында елге кеңінен таныла бастағанда әлгі қыз оған ерекше ықылас қояды. Күні-түні әндерін тыңдап, өмірге деген құлшынысы қайта оянғандай болады. Журналистің жазуынша, сол кезеңде қыздың әкесі қорадағы азын-аулақ сиырдың бірін сатып, қызын ертіп Алматыға арнайы жолға шыққан. Ондағы мақсаты қызының арманын орындау болған.
Әңгімені айтқан жігіттің сөзінше, әкесі қызын Мейрамбектің концертіне апарып, қолына гүл ұстатып, әншімен жолықтыруға тырысқан. Қыз сүйікті әншісіне гүл беріп, қолтаңба алып, тілегін естіп, ауылына ерекше күйде оралады. Ербол Мәндібектің айтуынша, сол сапардан кейін қыздың өмірі күрт өзгергені жөнінде сөз болған. Ауыл адамдары оның денсаулығы түзеліп, кейін тұрмыс құрып, бала-шағалы болғанын айтады екен. Автор мұны аңызға бергісіз әсерлі әңгіме ретінде қабылдағанын жасырмайды.
Осы оқиғаны мысалға алған Ербол Мәндібек ғашық болу сезімі адам өміріндегі ең ғажап күйдің бірі екенін айтады. Оның пайымынша, махаббат адамның жан дүниесін қозғалтатын, өмірге деген көзқарасын өзгертетін үлкен күш. Кей адамды жігерлендіреді, кей адамның жүрегін жұмсартады, кей жанға үміт береді. Журналист махаббаттың ең биік түрі отбасы мен адал жарға деген ілтипат екенін де атап өтеді.
Сондай-ақ автор жазбасында Мейрамбек Беспаевтың шыққан тегі туралы да тоқталған. Оның сөзінше, бұл жайында көпшілік біле бермеуі мүмкін. Ербол Мәндібек ақын Қайнар Алагөздің тікелей эфирінде айтылған әңгімеге сүйеніп, әншінің арғы аталары Қостанай өңірімен байланысты екенін келтіреді. Кейбір деректерде Мейрамбек Беспаев қыпшақтың Торы атасынан тарайды деген мәлімет барын да жазады. Алайда ол бұл жерде басты мәселе ру шежіресі емес екенін ерекше аңғартады.
Контекст
Журналистің түйіні басқа. Оның айтуынша, Мейрамбек Беспаев бір рудың, бір аймақтың ғана емес, барша қазаққа ортақ өнер иесі. Оның әндері тұтас бір буынның сезіміне әсер етті, талай жанның жастық шағымен бірге жасасты. Ербол Мәндібек сондықтан да әншіні елге ортақ құндылық, қазаққа ортақ мақтаныш деп бағалайды.
Жазба соңында автор Мейрамбек Беспаев пен жары Мархаббаттың шаңырағына ізгі тілек арнап, олардың махаббаты баянды болып, ұрпақ қуанығына кенеле беруін тілейді. Журналистің ойынша, ел жүрегіне әнімен жол тапқан өнер иесіне деген халық ықыласының сыры да осында жатыр.
Танымал журналист Ербол Мәндібек бұған дейін Алматыда Баян Мақсатқызына ескерткіш орнатуды ұсынған болатын.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
