Алматы қаласы 2025 жылдың басынан қыркүйекке дейін инвестициялық тұрғыдан айырықша табыстарға қол жеткізді. Қалаға негізгі капиталына 1,5 трлн теңгеге жуық инвестиция тартылғаны хабарланды, оның ішінде жеке сектор үлесі 1,1 трлн теңгені құрады, – деп хабарлайды Ertenmedia.kz Алматы қаласы әкімінің баспасөз қызметіне сілтеме жасап.
Бұл көрсеткіш Алматының республика ішіндегі және аймақтық деңгейдегі инвестициялық орталық ретінде орныққанын нақты айғақтайды. Қазіргі кезде жалпы құны 3,6 трлн теңгеден асатын 189 инвестициялық жоба жүзеге асырылуда, ал олардың арқасында шамамен 33 000 жаңа жұмыс орны ашылмақ.
Осындай көлемдегі инвестициялар шаһар экономикасын әртараптандыруға, индустриялық негізді күшейтуге және инновациялық бағыттарды дамытуға мүмкіндік береді. Шағын және орта бизнес – барлық жұмыс орындарының жартысын қамтамасыз етіп отырған саланың тірегі ретінде танылған, ал 50 млрд теңгеден аса қаржы кәсіпкерлерді қолдауға бөлінгені – республиканың ішінде ең жоғары көрсеткіш.
Бұл масштабты көрсеткіштер экономикадағы өсімді сырт көзге көрінетіндей етеді. Бірақ есімізде болсын: инвестор тартып қана қоймай, тартылған капиталдың сапасы, жобалардың орындалуы және тұрғындарға тікелей әсері маңызды.
Туризм саласында да қалыптасқан жағдайды айрықша атап көрсетуге болады. 2025 жылғы алғашқы жартыжылдық деректері бойынша Алматыға 1 миллионнан астам турист келген, бұл қала экономикасына жаңа серпін беруде. Туризм инфрақұрылымы, мәдени және бизнес орта қалыптастыру барлығы инвестициялық тартымдылықты күшейтудің бір бөлігі. Әлемдік тәжірибе де қалаға сыртқы капиталмен қатар туристік ағымды құру экономикадағы құбылмалылыққа қарсы тұрақтылықтың көзі ретінде қарастырады.
Алматыда 189 жоба іске асырылып жатқан болса да, олар нақты қандай салаларда екенін, қандай көлемде өндіріс тұрғыдан тәуелді екенін ашық қарастыру қажет. Кәсіпкерлікті қолдау шараларының тиімділігі маңызды. Қаржыландыру сомасы ғана емес, ол кәсіпкердің нарыққа шығуына, өндірісті дамытуға, экспортқа шығуына көмектесе ме сол сұрақ. Бұдан басқа инвестор ортасын құруда лицензиялық және нормативтік базаның айқын әрі тұрақты болуы сыртқы капитал үшін шешуші фактор. Алматының «Invest in Almaty» порталы һәм цифрлық инвестициялық платформа арқылы үдерістерді автоматтандыру бағытындағы қадамдары осы тұрғыда оң сигнал.
Алматы үшін басты артықшылық, қалада логистика, халықаралық байланыс, ірі нарық жүйесі қалыптасқан. Туризм, бизнес қызметтері, өндірістік және қызмет көрсету салалары бәрі бір-бірін толықтырып, инвестициялық экожүйені құруда. Қала басшылығының міндеті осы мүмкіндікті тиімді пайдалану, әлеуметтік қамту және қаланың тұрғындарына пайдасын жеткізу. Ақпараттық жарияланымдардың негізінде, бастапқы кезең сәтті өтуде әрі қаланың инвестициялық бәсекелестігі өсті.
Алматы қаласы инвестициялық тартымдылықты нақты көрсетіп отыр. Әрбір инвестиция жұмыс орны, технология, экспорт немесе туризм арқылы қаланың дамыуына әсер етеді.
