Қазақстанда ең төменгі жалақыны көтеру мәселесі мобильді аударымдарды бақылау өлшеміне де әсер етуі мүмкін, деп хабарлайды Ertenmedia.kz.
Мемлекеттік кірістер комитетінің арнаулы салық режимдерін әкімшілендіру басқармасының басшысы Ерқанат Шынберген осы ықтимал өзгерістің мән-жайын түсіндірді.
Қазір салық органдары 2026 жылдың алғашқы тоқсанына қатысты банк деректерін саралап жатыр. Нысанаға мобильді аударым арқылы заң бұзушылық белгісі байқалған азаматтар ілініп отыр.
Нені білу керек?
Қолданыстағы талап бойынша бақылауға түсу үшін үш шарт қатар келуі керек. Біріншісі бір адамға 100 және одан да көп әртүрлі тұлғадан ақша түсуі. Екіншісі мұндай қозғалыс қатарынан үш ай бойы қайталануы. Үшіншісі жалпы сома 1 млн 20 мың теңгеден асуы тиіс.
Соңғы меже ең төменгі жалақы көлеміне тікелей байланған. Қолданыстағы формула бойынша шек 12 айлық ең төменгі жалақы мөлшерімен есептеледі. 2026 жылы ең төменгі жалақы 85 мың теңге деңгейінде бекітілгендіктен, бақылаудағы сома 1 млн 20 мың теңге болып тұр.
Алайда жағдай өзгеруі мүмкін. Бұған дейін Ұлттық экономика бірінші вице-министрі Азамат Әмрин ең төменгі жалақыны 150 мың теңгеге дейін көтеру мәселесі қаралып жатқанын айтқан еді. Егер осындай шешім қабылданса, мобильді аударымға қатысты шекті меже де 1 млн 800 мың теңгеге дейін өседі.
Ерқанат Шынбергеннің сөзінше, комитеттегі есеп ең төменгі жалақыға байланған. Сондықтан ең төменгі жалақы ұлғайса, тиісті сомалар да қайта қаралады. Оның айтуынша, Кәсіпкерлік кодекстегі көрсеткіштер де соған сай өседі.
Қазір тағы бір маңызды кезең жүріп жатыр
15 сәуірге дейін екінші деңгейлі банктер қазақстандықтардың банк операциялары жөніндегі мәліметті салық органдарына өткізіп үлгерді. Енді ай соңына дейін сол дерек толық талданып, күмән тудырған тұлғалардың тізімі жасалуы керек.
Ал мамыр айында азаматтарға салық органдарынан ескерту келуі мүмкін. Онда анықталған заңбұзушылық белгісін жою талабы көрсетіледі.
Мұндағы басты астар анық. Егер ең төменгі жалақы көтерілсе, мобильді аударымға қатысты шек те жоғарылайды. Демек, салық бақылауындағы сүзгі сол күйі қалмайды, елдегі табыс деңгейімен бірге қозғалады. Бірақ негізгі принцип өзгермейді: тұрақты түрде көп адамнан ірі көлемде ақша алып отырған азамат бәрібір назардан тыс қалмайды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
