Көкшетауда 630 орынға арналған жаңа көпсалалы аурухананың құрылысы аяқталуға жақын. Президент Қасым-Жомарт Тоқаевтың тапсырмасымен салынып жатқан кешен Ақмола облысы мен тұтас Солтүстік макроөңірдің медицина мүмкіндігін кеңейтеді, – деп жазады Ertenmedia.kz.
«Бірінші байлық – денсаулық» деген аталы сөз бар. Қазіргі облыстық аурухананың орнын басатын жаңа кешенде 28 клиникалық бөлімше бір шаңырақ астына жиналады. Мұнда қабылдау мен диагностикадан бастап, шұғыл көмек, хирургия, терапия, жансақтау, қарқынды терапия және оңалту қызметіне дейін көрсетіледі.
Аумағы 111 мың шаршы метрден асатын нысан Сарыарқа шағын ауданындағы 17 гектар жерде салынып жатыр. Қазір аурухананың дайындық деңгейі 74 пайызға жеткен. Құрылыс алаңында 2300-ден астам маман мен 50-ден астам техника еңбек етуде.
Мердігерлер қадаларды қағу жұмысын толық аяқтап, ғимараттың монолитті қаңқасын тұрғызды. Қасбет пен терезелерді орнату жұмысының жартысынан астамы орындалған. Аурухананы 2027 жылдың екінші тоқсанында пайдалануға беру жоспарланып отыр.
Жаңа кешеннің іске қосылуы күрделі диагноз қойылған науқастарға жергілікті жерде мамандандырылған әрі жоғары технологиялық көмек алуға жол ашады. Соның арқасында тұрғындарды ем іздеп басқа өңірге жіберу азаяды. «Ауруын жасырған өледі» дейді халқымыз, ал дер кезінде қойылған диагноз талай адамның өмірін сақтап қалады.
Нысанның орналасуы жедел медициналық көмек қызметі үшін де қолайлы болмақ. Реанимациялық бригадалар қаланың кез келген нүктесіне 15-20 минут ішінде жете алады. Жаңа аурухана Көкшетаудың ғана емес, Солтүстік өңірдің денсаулық сақтау жүйесіне жаңа тыныс бермек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
