Астанада екі баласының көзінше сүйіктісін қатыгездікпен өлтіріп, артынша 25-қабаттан секіріп аман қалған Ержан Иманқұловтың сот процесі тағы да белгісіз мерзімге шегерілді. 31 жастағы Сания Әлімжанованың қазасына қатысты істе прокурорлар күдіктіні қылмыстық жауапкершіліктен босатып, мәжбүрлі емдеуге жіберуді сұраған соң, қоғамда әділдікке қатысты дау қайта өршіді, деп хабарлайды Ertenmedia.kz.
Балалардың көзінше жасалған қанды оқиға
Елордадағы «Орбита» тұрғын үй кешенінде орын алған қайғылы оқиға қоғамды дүр сілкіндірген еді. Тергеу материалдарына сәйкес, марқұм Сания Әлімжанова күдіктінің құмар ойындарға тәуелділігі мен 10 миллион теңгеге жуық қарызы барын білген соң, қарым-қатынасты үзген. Қылмыс болған күні бойжеткен 102 арнасына қоңырау шалып, өміріне қауіп төніп тұрғанын айтып үлгерген.
Алайда киімінің ішіне пышақ жасырып келген 37 жастағы Ержан Иманқұлов келіншекті жуынатын бөлмеге сүйреп кіргізіп, балаларының көзінше бірнеше рет пышақ сұққан. Соққының бірі жүрекке тиіп, әйел оқиға орнында көз жұмды. Үйдегі 7 және 10 жастағы екі ұл бала шыңғырып көршілерден көмек сұраған, бірақ есікті бұзып кірген куәгерлер де келіншекті ажалдан арашалап қала алмады. Қанды қылмыстан соң ер адам кіреберіс балконнан, яғни 25-қабаттан төмен секіріп, тұрақта тұрған көліктің үстіне құлап, ғажайыптың күшімен тірі қалған.
Прокурордың тосын ұсынысы және сараптамалар қайшылығы
Күдіктіні Қылмыстық кодекстің 99-бабы 2-бөлігі (аса қатыгездікпен адам өлтіру) бойынша 15 жылдан өмір бойына дейін бас бостандығынан айыру жазасы күтіп тұрған еді. Алайда тараптар жарыссөзге жеткенде, мемлекеттік айыптаушы оны қылмыстық жауапкершіліктен босатып, психиатриялық емханаға жабуды талап етті. Прокуратураның уәжінше, ол қылмыс жасаған сәтте «уақытша есі дұрыс емес күйде» болған.
Сотталушының психикалық жағдайына қатысты медициналық қорытындылар бір-біріне мүлде қайшы келеді. Алғашқы сараптамалар оның жарақатына байланысты нақты баға бере алмаса, кейінгі тексеру бас миының зақымдануы мен есте сақтау қабілетінің жоғалғанын алға тартты. Ал Ақтастағы психиатриялық емхана мамандары күдіктінің дені сау екенін, емдеуді қажет етпейтінін және тергеуге толық жауап бере алатынын растаған.
Осы қайшылықтарға байланысты судья Айжан Құлбаева істі прокуратураға қайта тергеуге қайтарған болатын, алайда енді сот процесі себепсіз тағы да тоқтап қалды.
Таңдамалы амнезия: туыстарының күдігі
Марқұмның туған-туыстары мен құқық қорғаушылар сотталушының «жынды» кейпіне еніп, жазадан құтылуға тырысып жатқанына сенімді. Олар күдіктінің есте сақтау қабілеті өте таңдамалы түрде жоғалғанына назар аудартады.
Сарапшылардың алдында ол өз балалық шағын, отбасын, жақындарының телефон нөмірлерін үтір-нүктесіне дейін есіне түсірген. Бірақ адам өлтірген күні не істегенін «ұмытып» қалған болып шықты. Жәбірленуші тарап көліктің төбесіне құлап дене жарақатын алған адамның әрекетін есінен адасқан науқас деп тану – нағыз заңсыздық екенін айтып, оны қатаң жазаға тартуды талап етуде.
Жазадан қашу тәсілі ме, әлде сот төрелігінің дәрменсіздігі ме?
Бұл резонансты іс Қазақстанның сот-сараптама және құқық қорғау жүйесіндегі үлкен олқылықты жайып салды. Қоғамда ауыр қылмыс жасап, соңынан психикалық ауруханаға «қашып тығылу» арқылы жазадан жалтарған оқиғалар аз емес. Психиатриялық мекемеге түскен адам бірнеше жылдан соң «айығып кетті» деген жалған қағазбен бостандыққа шығып кете алатынын тәжірибе көрсетіп отыр.
Анасынан айырылып, жетім қалған екі баланың көз жасы тұрғанда, соттың мәселені созбалаңға салып, отырыстарды белгісіз себеппен кейінге қалдыра беруі халықтың әділ сотқа деген сенімін одан әрі шайқалтады.
Егер азаматтық некедегі әйелін бауыздап өлтірген адам тиісті жазасын алмай, психикалық науқас болып құтылып кетсе, қоғамда заң мен әділдіктің бар екеніне кім кепіл бола алады? Мұндай шешім зорлық-зомбылық жасаушыларға жазадан құтылудың дайын сценарийін ұсынғанмен бірдей болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
