Шымкенттегі М.Өтебаев атындағы жоғары жаңа технологиялар колледжінде «Таза Қазақстан – жастар таңдауы» атты дебат сайысы өтті. Студенттер қоршаған ортаны қорғау мен экологиялық мәдениетті қалыптастыру жолдарын талқылады, – деп жазады Ertenmedia.kz.
Іс-шараға оқу орнындағы «Шамшырақ» дебат клубының мүшелері қатысты. Жастар экологиялық мәселелерге қатысты түрлі көзқарасты ортаға салып, өз ұстанымын дәлелдеуге тырысты.
Шымкентте тұрғындардың экологиялық сауаттылығын арттыруға бағытталған іс-шаралар тұрақты ұйымдастырылып келеді. Мектептерде, колледждер мен жоғары оқу орындарында семинар, тренинг және ашық сабақ өткізіледі.
Сонымен қатар оқушылар мен студенттерге экоэкскурсия ұйымдастырылып, табиғатты қорғау жөніндегі тәжірибелік жұмыстар жүргізіледі. Мұндай шаралар жастардың қоршаған ортаға жауапкершілікпен қарауына ықпал етеді.
Дебат барысында қатысушылар екі тарапқа бөлінді. Олар мектеп бағдарламасына арнайы экологиялық сабақ енгізу керек пе деген мәселе төңірегінде пікір таластырды.
Бірінші топ экологиялық білімді жүйелі түрде оқыту қажет екенін алға тартты. Олардың пікірінше, арнайы пән балаларға тазалық пен табиғатты қорғаудың маңызын ерте жастан түсіндіреді.
Екінші тарап экологиялық мәдениетті жеке сабақ арқылы емес, қоғамдық шаралар мен тәжірибелік жұмыстар арқылы қалыптастыру тиімді деп есептеді. Олар сенбілік, акция және экожобалардың ықпалына назар аударды.
Құқықтану мамандығының студенті Батырбек Ержанұлы көшеде қоқыс тастамау тазалық мәдениетінің негізгі белгісі екенін айтты. Оның сөзінше, тұрақты экологиялық шаралар қоғамның санасын өзгерте алады.
Тарих пәнінің мұғалімі әрі дебат клубының жетекшісі Ернар Мырзабайұлы пікірсайыстың жастардың ойлау қабілетін дамытатынын атап өтті. «Шамшырақ» клубының мүшелері қалалық және республикалық жарыстарда жүлде алып жүр.
Дебат студенттерге экологиялық мәселені әр қырынан қарастыруға мүмкіндік берді. Қатысушылар дәлел келтіру, қарсы пікірді тыңдау және ортақ шешім іздеу дағдысын жетілдірді.
«Таза Қазақстан» бастамасы аясындағы білім сайысы жастардың таным көкжиегін кеңейтті. Студенттер таза әрі жайлы қала қалыптастыру экологиялық сауат пен күнделікті тәртіптен басталатынын көрсетті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
