Алматыда «Алматы – біздің ортақ үйіміз» науқаны, республикалық «Таза Қазақстан» бағдарламасы және жаңа көріктендіру ережелері аясында 6 039 бизнес нысанын төлқұжаттау аяқталды. 1 сәуірден бастап кәсіпкерлер үшін көріктендіру төлқұжатын міндетті түрде сақтау енгізіледі, деп хабарлайды Ertenmedia.kz
Көріктендіруге кім жауапты?
Жаңа талапқа сәйкес, әрбір бизнес көріктендіру төлқұжатын алып, оған тиесілі аумақтың тазалығы мен тәртібін сақтауға міндетті. Бұл талап меншік нысанына қарамастан барлық кәсіпкерге қатысты. Ғимарат иелері, сондай-ақ ПИК, МИБ, ҚС сияқты заңды және жеке тұлғалар мен жер пайдаланушылар аумағының тазалығын қамтамасыз етіп, ғимарат қасбеттерінің уақытылы жөнделуі мен сырлануын қадағалауға тиіс. Сонымен қатар, олар ескерткіш тақталар, көше көрсеткіштері (тұйық көшелер мен алаңдарды қосқанда), нөмірлік белгілер, маңдайшалар мен ақпараттық тақтайшалардың тазалығын және дұрыстығын сақтауға міндетті.
Қыс мезгілінде ғимарат иелері тұрғындар мен жалға алушыларды қар мен мұзды тазалау жұмыстары туралы алдын ала хабардар етуге тиіс.
Талаптардың орындалуын кім қадағалайды?
Көріктендіру төлқұжатының талаптарының орындалуын аудан әкімдіктерінің көріктендіру және экология бөлімі бақылайды.
Талаптар сақталмаса не болады?
Талапты бұзған кәсіпкерлер Қазақстан Республикасының Әкімшілік құқық бұзушылық туралы кодексінің 505-бабы бойынша әкімшілік жауапкершілікке тартылады. Шағын бизнес субъектілері мен коммерциялық емес ұйымдар үшін айыппұл мөлшері – 30 АЕК. Орта бизнес субъектілері үшін – 40 АЕК. Ірі бизнес субъектілері үшін – 100 АЕК.
Бизнес қалай тартылды?
Төлқұжаттау үдерісі 2024 жылы көріктендіру ережелерінің жаңартылуынан кейін басталды. Бұл үдерісті жеделдетуде «Жауапты бизнес – көрікті қала» бастамасы маңызды рөл атқарды. Ол «Алматы – біздің ортақ үйіміз» науқаны аясында жүзеге асырылды. Аудан әкімдіктерінің кәсіпкерлік бөлімі бизнес иелерімен кездесіп, көріктендіру төлқұжаттарын енгізу және талаптарды орындау бойынша түсіндіру жұмыстарын жүргізді. Төлқұжаттауға аудан әкімдігі мен кәсіпкерлер бірлесе қол қойды.
Төлқұжаттау қорытындысы бойынша алматылық кәсіпкерлер ойын айтты.
«Төлқұжатты түсіндіру айқын және қолжетімді болды. Біз аумағымызды таза әрі ұқыпты ұстау үшін бар күшімізді салуға дайынбыз. Алматы тұрғындарын қаланың тазалығын сақтауға шақырамын», – деді Mega Cars ЖШС компаниясының өкілі Антон Иванов.
