Ақ үйдің баспасөз хатшысы Каролин Левитт Джо Байден әкімшілігінің мемлекеттік қаржыны тиімсіз пайдаланғанын мәлімдеді, — деп жазады Ertenmedia.
Оның сөзінше, демократтардың командасы Қазақстандағы «дезинформацияға қарсы күрес» жобасына 4,5 млн доллар бөлген. Левитт бұл деректі Ақ үйдегі брифингте жариялады.
Одан бөлек, Гуатемалада жыныс ауыстыруға 2 млн доллар, Ирактағы «Сезам көшесі» шоуына 20 млн доллар және Мысырдағы туризмді дамытуға 6 млн доллар бағытталғаны айтылды. Левитт Джо Байден ұсынған мұндай жобаларға қисынды негіз жоқтығын алға тартып, оларды «ақылға қонымсыз шығындар» деп атады.
«Трамп әкімшілігі осы сияқты артық шығындарды қысқартуды көздейді, ал демократтар керісінше, ұсақ-түйекке қомақты қаражат жұмсап жатыр. Мысалы, Солтүстік Каролина мен Калифорния тұрғындары көмекке мұқтаж кезде федералдық бюджеттің едәуір бөлігі шетелдік бағдарламаларға жұмсалып отыр», – деді Левитт.
Ол «Қазақстандағы дезинформациямен күрес» деген атпен қаржыландырылып жатқан жоба туралы егжей-тегжейлі мәлімет бермеді. Сонымен бірге «егер қажет болса, Байден әкімшілігінің дәл осындай шығындары жайлы толық тізімді ұсына алатынын» жеткізді.
Қазіргі президент Дональд Трамп инаугурациядан бері бюджет үнемдеу мәселесін жиі көтеріп келеді. Оның айналасындағы адамдар көптеген халықаралық бағдарламаны қысқарту немесе мүлдем тоқтату керек деген ұстанымда.
