Қайтарылған активтерді басқару компаниясы 4-7 наурызда өтетін жаңа сауда-саттық туралы жариялады. Бұл туралы Tenrginews жазды, — деп хабарлайды ErtenMedia.
Аукционға қойылған активтердің ішінде 63 зергерлік бұйым бар. Олардың ішіндегі ең қымбаты:
- DE BEERS сырғасы, жалпы салмағы 6,06 карат гауһар тастармен көмкерілген, құны 158 миллион теңгеге бағаланады. Әшекей 750-ші ақ алтыннан жасалған.
- Van Cleef & Arpels алқасы 55 миллион теңгеге бағаланған. Ол 750-ші ақ алтыннан жасалған, жалпы салмағы 16,92 карат гауһар тастармен көмкерілген және брендтің белгісі бар.
- YEPREM сақинасы 14 миллион теңгеге бағаланған. Эксклюзив сақина 750-ші ақ алтыннан жасалған және 85 гауһармен безендірілген.
Айта кетейік, бұған дейін құны бір-бір үйдің бағасына татитын эксклюзив сағаттар сатылатыны хабарланды.
Сағаттар тек сыртқы көрінісімен емес, бағасымен де таңғалдырады. Бір-бір үйге татиды.
Мысалы, Bovet Fleurier Grand Complications Amadeo Fleurier қалта сағаттары 28 830 399 теңгеге сатылымға шығарылды. Кепілдік жарнасы – 4 324 560 теңге. Сағаттар ақ алтын мен сапфир әйнегінен жасалған. Ол 50 дана шектеулі серияда шығарылған.
