Алматыда балалар ауруларын ерте анықтау мен емдеудің озық тәсілдеріне арналған халықаралық ғылыми-тәжірибелік конференция өтуде, деп хабарлайды Ertenmedia.kz.
Ауқымды жиынға Қазақстанның жетекші ғалымдарымен қатар Австрия, Беларусь, Ұлыбритания, Дания, Израиль, Мажарстан, Қырғызстан және Ресейден келген медицина сарапшылары мен Дүниежүзілік денсаулық сақтау ұйымының өкілдері қатысуда. Шара барысында педиатрия, балалар хирургиясы және алғашқы медициналық-санитарлық көмек көрсету салаларының мамандары өзекті мәселелерді ортаға салды.
Ерте анықтау тәсілдері мен жаңа бағыттар
Конференция шеңберінде балалар ауруларының алдын алу, ерте кезеңде диагностика жасау және емдеудің заманауи халықаралық тәсілдері таныстырылуда. Сарапшылар педиатрия қызметін жетілдіру, медицина кадрларын даярлау сапасын арттыру және ғылыми ізденістерді клиникалық тәжірибеге енгізу мәселелерін талқылауға шығарды.
Ұсынылған жаңа әдістемелер патологияларды баланың алғашқы даму кезеңінде анықтап, күрделі асқынулардың алдын алуға мүмкіндік береді.
Шеберлік сыныптары және дәрігерлердің біліктілігі
Кәсіби тәжірибе алмасу аясында отандық және шетелдік дәрігерлер педиатрия мен балалар хирургиясының күрделі бағыттары бойынша жеті шеберлік сыныбы мен семинар өткізді.
Аталған оқу-тәжірибелік шаралар арқылы еліміздің түрлі өңірінен келген 800-ден астам дәрігер өз білімін жетілдіріп, халықаралық емдеу хаттамаларымен танысты.
Конференция гибридті форматта ұйымдастырылғандықтан, өңірлердегі медицина қызметкерлері де талқылауларға қашықтан қосылып, халықаралық сарапшылардың кеңесін алуға мүмкіндік алды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
