Талдықорғанда қаза тапқан Бекпаевтар отбасының жақындары бұған дейін Болат Назарбаевтың мешітіне газ тарту кезінде заңсыз әрекеттер жасалғанын мәлімдеді. Айыптауларға әкімдік пікір білдірді. Бұл туралы NewTimes.kz жазды, — деп хабарлайды ErtenMedia.
Жетісу облысы әкімдігі әзірге нақты қорытынды жасауға ерте екенін мәлімдеді. Газ құбыры заңды немесе заңсыз салынғанын тек тергеу анықтай алады. Ресми деректерге сүйенсек, бұл істі тергеу тоқтатылған жоқ және полицияның бақылауында.
Марқұмдардың 16 жастағы ұлы аман қалғандардың ішінде ең ауыр жарақат алған. Ол оттың ішінен жақындарын құтқармақ болып, қатты күйік алған. Жасөспірім ауруханаға денесінің 43% күйік жарақатымен түскен.
«Науқас бір айдан аса уақыт жансақтау бөлімінде жатты. Осы уақыт ішінде оған гемодиафильтрация және гипербариялық оттегі терапиясы (ГБО) сынды көптеген медициналық процедура жасалды. Жетекші мамандардың консилиумының қорытындысы бойынша оны Алматыдағы арнайы орталыққа ауыстыру туралы шешім қабылданды», – деп мәлімдеді дәрігерлер.
Қазір 16 жастағы Асан Ерланұлының жағдайы өте ауыр, оның халі күннен-күнге нашарлап барады. Бұған дейін оның әжесі немересін Алматыға уақытында ауыстырмағандықтан, емдеу шаралары кеш басталғанын айтқан.
Еске салайық, бұған дейін Жетісу облысында біраз уақыт бұрын қайтыс болғандардың туыстары трагедияға заңсыз жүргізілген газ құбыры себеп болды деп санайтыны хабарланды. Ол Талдықорған шетінде Болат Назарбаев салғызған мешітті жылытуға арналған.
