Жетісу облысында біраз уақыт бұрын қайтыс болғандардың туыстары трагедияға заңсыз жүргізілген газ құбыры себеп болды деп санайды. Ол Талдықорған шетінде Болат Назарбаев салғызған мешітті жылытуға арналған. Бұл туралы Newtimes.kz жазды, — деп хабарлайды ErtenMedia.
Марқұмдардың анасы Күләш Бекпаеваның айтуынша, мешітке арналған газ құбыры заңсыз, құжатсыз және техникалық талаптарды өрескел бұза отырып, асығыс тартылған. Сол себепті газ сыртқа тарап, соңы жарылыспен аяқталған.
«Облыс әкімдігі Болат Назарбаевтың барлық бұйрығын бұлжытпай орындады. Ол мешіт салуды тапсырды, салды, кейін олар газбен қамту орталық желіге қосылуын күтпестен газды қосып берді. Газ құбырын қалай болса солай, асығыс, ешқандай құжатсыз тартты. Тек Назарбаевқа жағыну үшін. Біз осы трагедияның себебін зерттей келе мұның бәрін түсіндік: газ қайдан жиналды, неге жарылыс болды, неге ұлымның балалары жетім қалды?» – дейді Күләш Бекпаева.
Бұл қайғылы оқиғадан ол ұлы мен келінінен айырылғанын айтты. Төрт бала ата-анасыз қалды. Марқұмдардың 16 жастағы үлкен ұлы әлі де өмір үшін күресіп жатыр. Жарылыс болғанына екі ай өтсе де, тергеу барысы туралы ешқандай нақты ақпарат жоқ.
«Екі жыл бұрын мешіт орталық газ жүйесіне қосылды. Көп ұзамай ұлымның үйінің маңында газ таралды. Газ ванна бөлмесіне жиналған, ал келінім таңғы жетіде жарықты қосқанда, жарылыс болған. Үй толық қирады. Үйдің құбырларында ақау табылмады, бірақ мешітке апаратын газ құбырында ақау анықталды,» – дейді зейнеткер.
Бекпаевтар отбасының туыстары бір уақытта әрі жерлеу рәсімдерін ұйымдастырып, әрі шындықты анықтау үшін күрескен.
Жарылыстан кейін жергілікті билік отбасына көмектесуге уәде берген. Бірақ марқұмдардың туыстарының айтуынша, шын мәнінде ешқандай көмек көрсетілмеген.
«Бар ауыртпалық біздің мойнымызға түсті – тергеу, құжаттар, жерлеу рәсімдері, ауруханадағы ем-дом. Әкімдіктен ешқандай көмек болған жоқ, тек бос сөз. Облыс әкімінің бірінші орынбасары жағдайды бақылауда ұстаймын деп айтқанымен, нақты әрекеттер көрген жоқпыз», — дейді олар.
Оқиға қалай болды?
2024 жылы 31 желтоқсанда Талдықорғанда Бекпаевтар отбасының үйінде жарылыс болды. Отбасы мүшелері – ата-анасы мен төрт бала тұратын үй түгелдей жанып кетті. Жеті адам ауыр күйік жарақатын алды. Отағасы Ерлан сол жерде қаза тапты, ал оның жұбайы Дания денесінің 98%-ы күйіп, кейіннен ауруханада көз жұмды.
