Перизат Қайратқа қатысты жаңа істің мән-жайы белгілі болды. Деректерді Қаржылық мониторинг агенттігі жариялады, — деп хабарлайды ErtenMedia.
Агенттік мәліметінше, 2025 жылы 23 қаңтарда Перизат Қайратқа қатысты мүгедек балаларға арналған оңалту орталығын салуға ақша жинау алаяқтығы бойынша сотқа дейінгі жаңадан тергеу тіркелген.
«Перизат Қайрат 2021 жылдың қараша айында Ақмола облысында «Батыр» қоғамдық бірлестігіне оңалту орталығын салу үшін ақша жинау мақсатында қайырымдылық аукционын ұйымдастырған. Жұрттың сенімін арттыру үшін мұқтаж мүгедек балалар мен олардың ата-аналарын іс-шараға тартқан», — деп жазылған мәліметте.
Сондай-ақ, ҚМА қанша қаржы қолды болғанын жария етті.
«Перизат Қайрат тарапынан таратылған жалған деректер бойынша 48 миллион теңге жиналып, құны 100 миллион теңге ғимарат сыйға тартылған. Алайда аукцион кезінде шын мәнінде 22 миллион теңге түскен, осы ақшаны ол өзінің жеке қажетіне жаратқан», — деп жазылған мәліметте.
Ресми ақпаратқа сүйенсек, Перизат Қайрат «Батыр» қоғамдық бірлестігі үшін құны 30 миллион теңге жер телімін сатып алғанын мәлімдеген, алайда бұл участокты 2019 жылы бірлестік өзі сатып алған.
«Оңалту орталығының құрылысы әлі басталмаған қалпында тұр. Орталықтың қажеттілігіне берілді деген ғимарат мүлдем жоқ болып шықты. Сотқа дейінгі тергеу жалғасып жатыр», — деп мәлімдеді ҚМА.
Еске салайық, 2024 жылы 14 қарашада Қаржылық мониторинг агенттігі Перизат Қайратқа 1,5 миллиард теңгені жымқырды деген күдік тағылғанын хабарлады. Сондай-ақ, 2023 жылдың қарашасында ол Палестина тұрғындарына гуманитарлық көмек ретінде жиналған қаражаттың 200 миллионын жеке мақсатта пайдаланған деген күдікке ілінді.
ҚМА дерегінше, 2023 жылғы желтоқсанда осы ақша есебінен Перизат Қайрат Sensata Plaza элиталық кешенінен 49 миллион теңгеге үш бөлмелі пәтер және 30 миллион теңгеге Mercedes-Benz EQE 500 4 Matic жаңа көлігін сатып алған.
16 қарашада Астана қаласының тергеу соты оны екі айға қамауға алу туралы шешім шығарды.
