Ғаламдық климаттық өзгерістер бүгінгі күні әлемдегі барлық елдер үшін үлкен сын-қатерге айналды. Температураның көтерілуі, құрғақшылық, су ресурстарының азаюы және табиғи апаттардың жиілеуі экономиканың барлық саласына әсер етуде. Осындай жағдайда Қазақстан да уақыт талабына сай әрекет етіп, төмен көміртекті және экологиялық таза экономикаға көшуге дайындалуы қажет. Бұл оңай процесс емес, сондықтан оның әділ және барлық азаматтар үшін қолайлы өтуі ерекше маңызды.
Осы мақсатта Қазақстанда Әділ көшу стратегиясы әзірленіп жатыр. Бұл құжат энергетика, өнеркәсіп, ауыл шаруашылығы және басқа да салаларды кезең-кезеңімен жаңғыртып, экологиялық таза технологияларды енгізуге бағытталған. Ең бастысы бұл өзгерістер адамдардың өмір сапасын төмендетпей, керісінше жаңа мүмкіндіктер ашуы тиіс. 2024 жылдың тамыз айында Орталық Азия бойынша климаттың өзгеруі мен жасыл энергетика жөніндегі Жобалық кеңсе Стратегияны әзірлеуді ресми түрде бастады. Қазіргі таңда бұл жұмыс белсенді жүргізіліп жатыр және сәуір айында өтетін өңірлік экологиялық саммит аясында жүзеге асырылуда. Саммит өңір елдері үшін маңызды алаң, сондықтан Стратегияның негізгі бағыттары дәл осы жерде талқыланады.
Стратегияны әзірлеу барысында мамандар төмен көміртекті экономикаға көшудің еңбек нарығына қалай әсер ететінін мұқият зерттеп жатыр. Мысалы:
- көмір және мұнай салаларында жұмыс орындарының қысқаруы мүмкін;
- сонымен бірге жаңартылатын энергия, жасыл технологиялар, энергия тиімділігі, экологиялық ауыл шаруашылығы және басқа тұрақты бағыттарда жаңа жұмыс орындары ашылады;
- жаңа салаларға кадр дайындау үшін қосымша білім беру бағдарламалары қажет болады.
Сонымен қатар, көшу процесінің әлеуметтік салдарын бағалау да өте маңызды. Өзгерістер әсіресе ауылдық жер тұрғындарына, аз қамтылған отбасыларға және экономикасы табиғи ресурстарға тәуелді өңірлерге әсер етуі мүмкін. Сондықтан Стратегия осал топтарды қолдау, жұмысқа орналастыруға жәрдемдесу, қайта даярлау және табысты сақтау шараларын қамтиды. Әділ көшу стратегиясының негізгі мақсаты елді экологиялық таза, қауіпсіз және ұзақ мерзімді даму моделіне көшіру, сондай-ақ бұл процесті әрбір азамат үшін тиімді ету. Яғни экономика жаңарып қана қоймай, халықтың өмір сүру деңгейі де жоғарылауы керек.
Жобалық кеңсе Әділ көшу стратегиясын әзірлеуде маңызды рөл атқарып отырған негізгі демеушілердің бірі Eurasian Resources Group (ERG) компаниясына ерекше алғыс білдіреді.
Бұл жұмыс Қазақстанның жасыл және тұрақты болашағын қалыптастыруға зор үлес қосатыны сөзсіз.
