Қазақстан Халық партиясы кезектен тыс XXV съезінде сайлауалды саяси бағдарламасы мен 72 кандидаттан тұратын партиялық тізімін бекітті, деп жазады Ertenmedia.kz.
Елордада өткен съезд жаңа Конституция күшіне енгеннен кейінгі партия үшін алғашқы ауқымды саяси жиын болды. Форумда 2026 жылғы 23 тамызға тағайындалған Құрылтай депутаттарының сайлауына арналған сайлауалды бағдарлама мақұлданды. Сонымен қатар партиялық тізім бекітіліп, Саяси кеңестің жаңа құрамы сайланды.
Елдің барлық өңірінен келген делегаттар алдында Қазақстан Халық партиясының төрағасы Нұрсұлтан Шоқанов бағдарламалық баяндама жасады. Ол өз сөзінде әділ саясатты ұлттық домбырамен салыстырды. Оның айтуынша, домбырада жалған ойнау мүмкін емес, өйткені халық жалғандықты бірден сезеді.
Партия төрағасы ел үшін жаңа кезең басталғанын атап өтті. Жаңа Конституция бүгінгі қоғамға да, келер ұрпаққа да қызмет етуі тиіс екенін айтты. Нұрсұлтан Шоқановтың сөзінше, Қазақстан Халық партиясы осы үдеріске өз үлесін қосып отыр. Съезде партияның стратегиялық бағыты айқындалып, сол жолда еңбек ететін кандидаттар ұсынылды.
ҚХП өз ұстанымы өзгермейтінін мәлімдеді. Партия Қазақстанның табиғи байлығы, ең алдымен, азаматтардың әл-ауқатына жұмыс істеуі керек деп санайды. Әлеуметтік басымдықтар ҚХП үшін есеп берудің құрғақ тармақтары ғана емес, нақты іспен өлшенетін күнделікті жұмыс ретінде сипатталды.
Партия өкілдері су тасқыны зардаптарын жою, аналарды қолдау, ерекше балалары бар отбасыларға көмектесу және еңбек адамының құқығын қорғау бағытындағы жұмыстарды осы ұстанымның дәлелі ретінде атап өтті.
Съезде таныстырылған сайлауалды платформа делегаттар мен кәсіби орта тарапынан қолдау тапты. Бағдарламаны талқылау кезінде білім беру саласының маманы Лейлә Күленова мектепке дейінгі және мектептегі білімге басымдық беру елдің әр өңіріндегі нақты жағдайдан туындаған стратегиялық қадам екенін айтты.
Қоғамдық келісім – басты құндылық
ҚР Еңбек және халықты әлеуметтік қорғау министрлігі Заң қызметі департаментінің директоры Серік Беркамалов адам капиталы мен еңбек адамын қорғау мәселесі партияның жаңартылған платформасының өзегіне айналғанын атап өтті. Бағдарламаны қолдап Қалел Мақсұтов та сөз сөйледі.
Партиялық тізімге 72 кандидат енгізілді. ҚХП өкілдерінің айтуынша, олардың қатарында азаматтардың мүддесін ашық қорғауға дайын заңгерлер, экономистер, мұғалімдер, дәрігерлер және қоғамдық пікір көшбасшылары бар. Съезд мінберінен қоғам қайраткері Ирина Смирнова мен медиа тұлға Аша Матай командаға қолдау білдірді.
Жиын барысында партияның Саяси кеңесі толық жаңартылды. Оның стратегиялық міндеттерін Эльмира Әуезова, Ләззат Сүлейменова және Балжан Досмұхамбетова таныстырды.
Нұрсұлтан Шоқанов ұрпақтар сабақтастығына да тоқталды. Ол көрнекті мемлекет қайраткері Ермұхамет Ертісбаевқа принципшілдігі, қайсар мінезі және өзіндік саяси мектеп қалыптастырғаны үшін алғыс айтты.
Съезд соңында Венера Нигматуллина мен Тамара Асардың бағдарламалық үндеулері тыңдалды. Партия басшысы жиынды қорытындылап, делегаттарды енжарлықты еңсеруге, әр үйге жетуге және Халық партиясының азаматтар сеніміне лайық екенін нақты іспен дәлелдеуге шақырды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
