ІІМ Еңбекшіқазақ ауданындағы УҰИ-де болған жағдайға пікір білдірді. Кінәлілер жұмыстан қуылып, бақылау күшейтілген, — деп хабарлайды ErtenMedia.
Алматы облысы Еңбекшіқазақ ауданы уақытша ұстау изоляторындағы жағдай бойынша тексеріс жүргізілген. Бейнетүсірілімді УҰИ-дің бұрынғы қызметкері қызмет мүдделеріне қайшы әрекет жасап, жүргізгені анықталған. Ол бұл үшін жеке ұялы телефонын пайдаланған.
«Қызметтік тәртіпті өрескел бұзғаны үшін ол арнайы шенінен айырылып, теріс себептермен жұмыстан қуылды. Сонымен қатар бұл дерек бойынша қылмыстық іс қозғалды. Қызметтік тәртіпті өрескел бұзғаны және тиісінше бақылау жүргізбегені үшін 16 басшы мен қызметкер лауазымнан босатылуға дейін қатаң тәртіптік жазаға тартылды. Оның ішінде УҰИ басшысы да лауазымнан босатылды», — деп жазылған хабарламада.
ІІМ мәліметінше, мұндай заңбұзушылықтарға қатаң тосқауыл қойылады.
«Олар бүкіл құқық қорғау жүйесінің беделіне нұқсан келтіріп, азаматтардың қауіпсіздігін қамтамасыз етіп, күнделікті өз міндеттерін адал орындайтын қызметкерлердің атына дақ түсіреді. Болған жағдайға байланысты УҰИ-де режимді бақылау күшейтілді: қосымша бейнемониторинг шаралары енгізіліп, ұқсас мекемелерде жоспардан тыс тексерулер басталды», — деп жазылған хабарламада.
Бұған дейінгі оқиға
Айта кетейік, бұған дейін Шерзаттың өліміне қатысы бар деген күдіктілердің изоляторда туған күн тойлаған видеосы әлеуметтік желілерде тарап кеткен еді. Бұл жағдай қоғамда тағы да резонанс туғызды.
Артынша Алматы облысының Полиция департаменті мән-жайды түсіндірді.
«Уақытша ұстау изоляторынан бір тұтқынның туған күнін атап өтуі бейнеленген видеоның таралуы бойынша жан-жақты тексеріс жүргізіліп жатыр. Барлық кінәлі тұлға, соның ішінде басшылық та қатаң жауапкершілікке тартылады. Тергеу барысы ерекше бақылауға алынды. Осы құқықбұзушылыққа ықпал еткен себептер мен жағдайларды жою бойынша шаралар қабылданды», — деп мәлімдеді полиция.
Еске салайық, 2024 жылы 4 қазанда Талғарда 16 жастағы жасөспірім Шерзат Болат қаза тапты. Араға біраз уақыт салып Шерзаттың ағасы Нұрқанат Ғайыпбаев та өлі табылды.
