Президент Қасым-Жомарт Тоқаев Шыңғыс Әріновті Алматы облысының әкімі қызметіне тағайындады. Мемлекет басшысы тиісті Жарлыққа 4 қыркүйекте қол қойды, деп хабарлайды Ertenmedia.kz.
Шыңғыс Әрінов осы күні қызметінен босатылған Марат Сұлтанғазиевтің орнына келді. Сұлтанғазиев Алматы облысын 2022 жылғы маусымнан бері басқарған.
Жаңа әкімнің кандидатурасы алдын ала облыстық, қалалық және аудандық мәслихат депутаттарының қарауына ұсынылды. Заңда белгіленген рәсім аяқталғаннан кейін Президент Әріновті қызметке бекітті.
Президент күзетінен облыс басшылығына дейін
42 жастағы Шыңғыс Әрінов бұған дейін Төтенше жағдайлар министрі қызметін атқарды. Ол жаңадан жасақталған Үкімет құрамына енген жоқ. ТЖМ басшылығына министрліктің бұрынғы аппарат басшысы Мұрат Мұханов тағайындалды.
Әріновтің еңбек жолының басым бөлігі Мемлекеттік күзет қызметімен байланысты. Ол 2006–2022 жылдары аталған құрылымда офицерлік қызметтен басшылық лауазымға дейін көтерілді.
2022 жылы Мемлекеттік күзет қызметі бастығының орынбасары әрі Президентті қорғау қызметінің бастығы болды. Төтенше жағдайлар министрлігінің тізгінін 2024 жылғы ақпанда ұстады.
Шыңғыс Әріновке генерал-лейтенант әскери атағы берілген.
Жаңа әкім туралы не белгілі
Шыңғыс Әрінов 1983 жылғы 29 қазанда Алматы облысында дүниеге келген. Әл-Фараби атындағы Қазақ ұлттық университетінің халықаралық қатынастар факультетін тәмамдаған.
Қазақ еңбек және әлеуметтік қатынастар академиясында заңгерлік білім алды. Азаматтық авиация академиясын тасымалды ұйымдастыру және көлікті пайдалану саласына қатысты мамандық бойынша бітірген.
Әріновтің Алматы облысына әкім болып тағайындалуы оның күштік құрылымнан өңірлік басқаруға ауысқанын білдіреді.
Енді ол халқы тығыз әрі қарқынды өсіп келе жатқан облыстың дамуына жауап береді. Өңірде ірі инфрақұрылымдық жоба жүзеге асырылып, ауыл шаруашылығы дамып келеді. Жаңадан құрылған Алатау қаласын қалыптастыру да облыс басшылығының негізгі міндетінің біріне айналмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
