Әлемдік сауданың тынысын тарылтқан АҚШ президенті Дональд Трамп қазақтарға да тырнағын батырды. Трамп Қазақстаннан импортталатын тауарларға 27% баж салығын енгізді, — деп жазады Ertenmedia.kz.
Бұл — Орта Азия елдері арасындағы ең жоғары көрсеткіш.
Ақ үй жариялаған тарифтік кестеге қарасақ, бұл қадам «өзара әділдік принципіне» негізделген. Құжатта Астана АҚШ тауарларына 54%-дық баж салығын салады деп көрсетілгенімен, бұл мәліметке қандай да бір нақты дәлел берілмеген.
Былтыр біздің ел АҚШ нарығына 1,97 млрд доллардың тауарын экспорттап, рекорд жаңартқан еді. Сарапшылардың сөзінше, енді осындай өсу траекториясында тұрған екіжақты сауда айналымына сызат түсуі ықтимал.
Аймаққа ортақ тарифтерге көз жүгіртсек, Қырғызстан, Өзбекстан, Әрмения, Тәжікстан және Түркіменстан үшін бар-жоғы 10%-дық баж белгіленген.
Сарапшылар АҚШ-тың Қазақстанды бөліп алып, 27%-дық тарифпен «жазалауы» саяси астары бар қадам болуы да ғажап емес екенін айтады.
Әлемнің өзге елдері үшін кедендік алым былайша жіктелген: Қытай үшін – 34%, Еуроодақ елдеріне – 20%, Ұлыбритания мен басым көпшілік мемлекеттер үшін – 10%. Израильдің өзі, АҚШ-тың жақын одақтасы саналғанымен, 17%-дық санкцияға ілігіпті.
Бір қызығы, тізімнен Ресей, Беларусьті таппадық.
