Қазақ футболы бір кездері халық арманы болса, енді қаржы былығы мен шексіз немқұрайлылықтың символына айналып барады. Бас прокуратура жүргізген соңғы тексерулер бұл шындықты тасқа басқандай дәлелдеп берді. Қазақстан футбол федерациясында (ҚФФ) бұрынғы басшылықтың тұсында 3 миллиард теңгеге жуық қаржы жымқырылғаны анықталған, – деп хабарлайды Ertenmedia.kz.
300 миллион теңге таңдаулы қызметкерлер мен спортшылар негізсіз сыйақылар ретінде берілген. Кімге берілді, не үшін берілді? Бұл сұрақтардың жауабын құқық қорға органдары анықтайды.
Тағы 350 миллион теңге Талғардағы база мен кеңсенің құрылысына бөлініпті. Бірақ атқарылған жұмыстың нәтижесі жоқ. Кеңсе мен база әлі салынып жатса керек. Қағазда ғана бар, ал шын өмірде – тек тозған бетон мен сорайып тоқтап тұрған кранды көруге болады.
Ал 135 миллион теңге неге кеткен десеңіз, ол «стратегияларға». Иә, дәл солай іске аспайтын, қолдануға жарамсыз, тек баяндамалар мен презентацияларды дайындауға жұмсалыпты. Мұндай стратегиялар тек Excel парақшасында өмір сүреді. Ал шын өмірде отандық футболшылар Еуропа ареналарында сүрініп, ұлттық құрамамыз жеңілуден көз ашпауда.
Бас прокуратураның тексеруі тек ҚФФ-мен шектелмеді. «Ордабасы», «Ақтөбе» және «Жетісу» клубтарында да ақшаға қатысты біраз былықтар ашылған. Келісімшарттар негізсіз қымбаттатылған, трансферлермен ойын жүргізілген, қаржы ұрланған.
Бұл тексерулерден кейін бірнеше қылмыстық іс қозғалып, материалдар Қаржы мониторингі агенттігіне берілді. Бұл жақсы. Бірақ елдің көкейіндегі басты сұрақ — неге осынша уақыт үндемей келдік? Қанша депутат шырылдап, қанша журналист дәлел келтіріп еді. Неліктен бұған дейін ешкім жауап бермеді?
ҚФФ-ның бұрынғы президенті Әділет Барменқұлов өткен жылдың қарашасында қызметінен кетті. Ол кезде ұлттық құрама Ұлттар лигасында соңғы орында еді. Сол сәтте бәрі өзгеруі тиіс еді, бірақ өзгеріс келмеді.
Парламент депутаттары да қарап жатпады. Олар жыл сайын футболға бөлінетін 10 миллиард теңгені еске алып, «мұның қайтарымы қайда?» деген сұрақ қойды.
Кейін ҚФФ-ның бұрынғы басшылығына қатысты тінту мен қылмыстық іс қозғалғаны белгілі болды. Бұл – баяғыда басталуы тиіс процесс еді. Бірақ, өкінішке қарай, біз әрдайым соңынан барып қолға аламыз.
Ұрланған үш миллиард – бұл тек қаржы ғана емес, сенімнің құлдырауы. Халықтың футболға деген махаббаты ұзақ жылдар бойы қолдан күйзелтілдің белгісі десек болады. Бізде мықты ойыншылар мен еңбекқор жаттықтырушылар бар. Бірақ дұрыс жүйе жоқ.
