17 жастағы Сая Қыдырәлі халықаралық ағылшын тілі емтиханында ең жоғары нәтиже 9 балл жинады. Ресми статистикаға сәйкес, бұл көрсеткішке үміткерлердің небәрі 0,5 пайызы ғана қол жеткізе алады екен, — деп хабарлайды ErtenMedia.
Жыл сайын 3,5 миллионнан аса адам IELTS емтиханын тапсырады, ал әлем бойынша орташа нәтиже — 6 балл.
«Ағылшын тілін 6 жасымнан үйрене бастадым. Анам үйрете бастады. Дұрыс әдістеменің және тапжылмай еңбектенгенімнің арқасында 1 жыл ішінде меңгердім. Күніне он сағаттан оқыдым. 7 жасымда еркін сөйлей бастадым. 9 жасымда сабақ бере бастадым», — деді ол сұхбатында.
Сая Қыдырәлі кейін өз жобасын жүзеге асырып, 10 жасында ересектерге сабақ бере бастаған. Оқушы 11 жасында бірінші рет IELTS тапсырған, бұл кезде 6.5 балл алған. Кейін бұл бағытта білімін тереңдеткен. Кейін 8 және 8.5 балл алған.
Дарынды оқушы 14 жасында тіл мектебін ашқан, 15 жасында Америкадан грант ұтып алған.
«Бірақ Қазақстанда қаламын деген шешім қабылдадым», — дейді оқушы.
