Жуырда әлеуметтік желіде Шерзат Болаттың ісі бойынша күдіктілер бір камерада туған күн тойлағаны жайлы видео тарап кетті. Жәбірленуші тараптың адвокаттары күдіктілер неге бір камерада отыр деген сауалға жауап берді, — деп хабарлайды ErtenMedia.
Қоғамда дау туғызған осы видеодан кейін Шерзат Болаттың отбасының адвокаттары баспасөз мәслихатын өткізді.
«Заңға сәйкес бір қылмыс бойынша күдіктілер бір камерада отыра алмайды. Шерзаттың өліміне күдіктілер қалайша бір камерада отыр?»- деп сұрады журналистер адвокаттардан.
Алматы қалалық адвокаттар алқасының адвокаты Ерлан Адаевтың сөзінше, бұл жайт, шынымен де, заң бұзу болып саналады.
«Алматы облысының Полиция департаментіне сауал жолдадық, онда күдіктілер қайда ұсталатыны, қандай мекемелерде, қандай уақытша ұстау изоляторларында отырғаны туралы мәлімет беруді сұрадық. Әрине, заң бойынша бір қылмысты жасады деген күдікке ілінген адамдар бір камерада отыра алмайды. Бірақ кеше олардың ұялы телефондары, гаджеттері бар екенін көргендіктен, олар бір-бірінің камерасына барған болуы мүмкін деп ойлаймыз», — деді адвокат.
Ерлан Адаев қазір бұл дерек бойынша тексеріс жүргізіліп жатқанын айтты.
Адвокат Саида Тәукелеваның айтуынша, Шерзаттың ісі бойынша күдіктілердің барлығы бір уақытша ұстау изоляторында емес. Оның сөзінше, видеодағы оқиға Еңбекшіқазақ аудандық полиция басқармасының уақытша ұстау изоляторында болған.
Бұған дейінгі оқиға
Айта кетейік, бұған дейін Шерзаттың өліміне қатысы бар деген күдіктілердің изоляторда туған күн тойлаған видеосы әлеуметтік желілерде тарап кеткен еді. Бұл жағдай қоғамда тағы да резонанс туғызды.
Артынша Алматы облысының Полиция департаменті мән-жайды түсіндірді.
«Уақытша ұстау изоляторынан бір тұтқынның туған күнін атап өтуі бейнеленген видеоның таралуы бойынша жан-жақты тексеріс жүргізіліп жатыр. Барлық кінәлі тұлға, соның ішінде басшылық та қатаң жауапкершілікке тартылады. Тергеу барысы ерекше бақылауға алынды. Осы құқықбұзушылыққа ықпал еткен себептер мен жағдайларды жою бойынша шаралар қабылданды», — деп мәлімдеді полиция.
Еске салайық, 2024 жылы 4 қазанда Талғарда 16 жастағы жасөспірім Шерзат Болат қаза тапты. Араға біраз уақыт салып Шерзаттың ағасы Нұрқанат Ғайыпбаев та өлі табылды.
