АҚШ пен Израильдің Иранға қарсы жасаған жаңа шабуылы ядролық бағдарлама бойынша келіссөздерді тағы да тұйыққа тіреді. Бұл жолы Иранның ұлттық қауіпсіздігі мен ел билігін тікелей нысанаға алған операция басталды, деп хабарлайды Ertenmedia.kz.
Бүгін жасалған соққылар Тегеранның солтүстігіндегі Шемиран ауданында орналасқан президент сарайы мен Иранның рухани көсемі аятолла Әли Хаменеидің резиденциясына бағытталды. Tasnim агенттігінің мәліметінше, бұл аймаққа жеті зымыран түскен. Сонымен қатар Associated Press агенттігі де Хаменеидің кеңсесіне жақын маңға шабуыл жасалғанын растады.
Reuters агенттігіне ақпарат берген дереккөздерге сүйенсек, аятолла Хаменеи шабуыл кезінде Тегеранда болмаған, ол алдын ала қауіпсіз жерге көшірілген. 86 жастағы аятолла Әли Хаменеи 1989 жылдан бері Иранның рухани көсемі ретінде билік етіп келеді. Ол Иран үкіметінің барлық тармақтарына, әскери күштерге және сот жүйесіне басшылық жасайды. Сондай-ақ, ол елдің рухани басшысы болып саналады.
Батыс елдерімен ұзақ жылдарға созылған шиеленіске қарамастан, Хаменеи билікте тұрақтылығын сақтап келді. Ол АҚШ-ты «Иранның басты жауы» деп жариялап, Израильді де Иранға қарсы басты күштердің бірі ретінде санайды. Хаменеидің билігіне Иран Ислам революциясы күзеті корпусы (IRGC) мен жүздеген мың мүшесі бар «Басидж» әскерилендірілген күштері берік қолдау білдіреді.
Хаменеи ұзақ уақыт бойы Иран ешқашан ядролық қару жасамайтынын, ядролық бағдарламаның тек бейбіт мақсатқа арналғанын мәлімдеп келеді. АҚШ барлау қызметтері мен БҰҰ-ның атом энергиясы агенттігі Иранның ядролық қару жасау әрекетін растайтын дәлелдер тапқан емес. Дегенмен, Израиль мен АҚШ-тың Трамп әкімшілігіндегі кейбір топтар бұған сенбейтінін ашық білдірген.
Жазда Израильдің қорғаныс министрі Исраэль Кац Хаменеиді тікелей сынап, оның билігіне қарсы ашық мәлімдеме жасаған болатын. Израиль премьер-министрі Беньямин Нетаньяху да Хаменеиге қастандық жасау туралы ойлар барын жасырмаған.
АҚШ президенті Дональд Трамп та аятолла Хаменеи туралы бірнеше рет мәлімдеме жасаған еді. ABC News телеарнасына берген сұхбатында ол Хаменеи «қатты алаңдауы керек» деп ескертіп, Иранда режим ауысуы «ең дұрыс шешім» болатынын айтқан.
Былтыр Иранға шабуылдар кезінде Трамп Хаменеидің орналасқан жерін білетінін және оны «оңай нысана» ретінде сипаттаған. Алайда, дәл сол сәтте оны өлтіру жоспары жоқ екенін де атап өткен. Соңғы шабуылдан кейін жасаған мәлімдемесінде Трамп Иранның әскери-теңіз күштері мен зымыран алаңдарын жойып жіберуге уәде етіп, Иран халқын үкіметті құлатуға шақырды.
Al Jazeera арнасының Иран бойынша сарапшысы Али Хашемнің айтуынша, АҚШ пен Израильдің бұл шабуылдары «Иран билігінің басшылығын жоюды» көздейді.
«Бұл операцияның қаншалықты табысты немесе сәтсіз болғанын әзірге нақты айту қиын», – деді сарапшы.
Хаменеи билігін нығайтуда Ислам революциялық гвардиясы мен жүздеген мың адамнан тұратын «Басидж» әскеріне арқа сүйейді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
