Алматы облысының Қаскелең қаласында халықаралық деңгейдегі «Dala Stage» кинопавильонының құрылысы басталды, деп жазады Ertenmedia.kz.
Жобаның басталуына арналған салтанатты рәсім ерекше форматта өтті. Голливуд актері Джеки Чан жолдаған символикалық уақыт капсуласы құрылыс алаңына тікұшақпен жеткізілді. Оны осы павильонда түсірілетін алғашқы жоба «Құдіретті сауыт-сайман 4: Ультиматум» фильмінің режиссері Роберт Кун қабылдап алды. Осы сәттің өзі жобаның халықаралық деңгейін айқын көрсетті.
Шараға облыс әкімі Марат Сұлтанғазиев қатысып, креативті және технологиялық индустриялар бағытындағы серіктестікке қатысты бірқатар келісімдерге қол қойды. Атап айтқанда, Джеки Чанның продюсері Ли Чиу Ва, «DALA EDGE» креативті және технологиялық индустриялар паркі және «Salem Entertainment» компаниясымен меморандум рәсімделді.
Аймақ басшысы өз сөзінде жаңа нысанның маңызы тек инфрақұрылыммен шектелмейтінін атап өтті. Креативті экономика қазір ұлттық дамудың маңызды бағытына айналған. Осындай жобалар арқылы ел жаңа өндірістік және мәдени кеңістік қалыптастырады. Кино өндірісіндегі заманауи технология мен ұлттық мазмұнды үйлестіру – негізгі мақсаттардың бірі ретінде қарастырылып отыр.
Павильон құрылысы кәсіби индустрияны қалыптастыруға бағытталған. Жоба шетелдік студиялармен бірлесіп жүзеге асады. Мұндай кооперация тәжірибе алмасуға жол ашып, жаңа буын мамандарды даярлауға мүмкіндік береді. Сонымен қатар өңірге еліміздің түкпір-түкпірінен шығармашылық жастар шоғырланып, тұрақты креативті орта қалыптасады.
Кино өндірісі бүгінгі таңда ірі декорациялар мен жоғары технологиялық шешімдерді талап етеді. «Dala Stage Creative Tech Park» осы талаптарға жауап беретін алаң ретінде қарастырылып отыр. Жоба отандық мамандарға әлемдік студиялармен бір деңгейде жұмыс істеуге жағдай жасайды.
Алғашқы түсірілім ретінде жоспарланған «Құдіретті сауыт-сайман 4: Ультиматум» фильмінде басты рөлді Джеки Чан орындайды. Оның продюсері Ли Чиу Ва жобаның қысқа уақыт ішінде нақты іске айналғанын атап өтті. Жарты жыл бұрын басталған келіссөздер бүгін нақты құрылыс кезеңіне өткен. Бұл динамика жобаның стратегиялық маңызын көрсетеді.
Кинопавильонның жалпы аумағы 15 гектарды құрайды, ал негізгі өндірістік ғимараттың көлемі 3 000 шаршы метр. Құрылыс жұмыстарын осы жылдың тамыз айында аяқтау жоспарланған. Жоба іске қосылғаннан кейін кино саласына инвестиция тарту, кәсіби кадр даярлау және халықаралық нарыққа бағытталған контент өндірісін дамытуға ықпал етеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
