Freedom Bank алдағы кезеңге арналған ауқымды жаңалығын жариялап, клиентке арналған өнім желісін бірден бірнеше бағытта кеңейтетінін мәлімдеді деп хабарлайды Ertenmedia.kz.
Freedom Inside форумында банк зейнеткерге арналған әлеуметтік адалдық бағдарламасын, жылдық мөлшерлемесі 5 пайыздан басталатын жаңа ипотеканы, қосымша ішіндегі Freedom Lenta платформасын, өзін-өзі жұмыспен қамтығандарға арналған толық циклді сервисті және ерекше дизайндағы карталарды таныстырды.
Ең елеулі жаңалық
Форумдағы ең елеулі жаңалықтың бірі зейнеткер мен жәрдемақы алатын азаматтарға арналды. Freedom Bank-тегі арнайы шотқа төлем түсетін клиент коммуналдық қызмет, дәрі-дәрмек, азық-түлік, әуе және теміржол билеті үшін жоғары кэшбэк ала алады.
Бағдарлама шартына сай, коммуналдық төлем мен дәріханадағы саудаға 10 пайызға дейін қайтарым қарастырылған.
Азық-түлікке төленетін кэшбэк 7 пайызға дейін жетеді. Одан бөлек, зейнеткер тоқсанына бір мәрте пойыз билетін тегін ала алады, ал ұшақ билетін 7 мың теңгеге дейінгі жеңілдікпен сатып алу мүмкіндігі беріледі. Балалы отбасы үшін азық-түлікке 5 пайызға дейін қайтарым ұсынылмақ.
Freedom Inside аясында Денсаулық сақтау министрлігі мен Freedom Bank арасында да келісім жасалды. Ынтымақтастық медициналық сервисті цифрландыруға бағытталған. Тараптар дәрігерге жазылу тетігін жетілдіруді, науқасқа ақпарат беру арнасын күшейтуді және медициналық көмекті цифрлық канал арқылы алуды ыңғайлы етуді көздеп отыр.
Сонымен қатар дәрі-дәрмекпен қамту жүйесіне де цифрлық шешім енгізіліп, процестің ашықтығы мен медицина және дәріхана ұйымдары арасындағы байланысты жақсарту жоспарланған.
Freedom және BI тандемі
Форумда Freedom Bank пен BI Group арасында да меморандумға қол қойылды. Соның аясында банк клиентіне жаңа жинақтаушы тұрғын үй ипотекасы ұсынылмақ. Бастапқы жарна 30 пайыздан 50 пайызға дейінгі аралықта белгіленген, ал мөлшерлеме 5 пайыздан басталады. Жылдық тиімді сыйақы мөлшерлемесі 5,1 пайыз деп көрсетілді.
Қосымша артықшылық ретінде BI Group нысандарының цифрлық витринасы іске қосылып, сатылым басталған алғашқы үш күнде банк клиенті Freedom SuperApp арқылы ипотеканы тиімді шартпен рәсімдей алады.
Ішкі қосымшадағы ең даулы әрі назар аудартқан жаңалықтың бірі Freedom Lenta болды. Оны банк қаржы мен бизнесті ұштастыратын әлеуметтік-коммерциялық алаң ретінде таныстырды. Платформада сатушы өз өнімін ұсынып, арнайы шарт жариялап, ұсынысын Freedom SuperApp арқылы нысаналы аудиторияға жеткізе алады.
Ал қолданушы тауар сатып алып қана қоймай, пікір жазып, контентпен әрекеттесіп, белсенділігі үшін кэшбэк жинайды. Ең қызығы, кәсіп иесі өз тауарына қосымша кэшбэк ұсынып, аудиторияны тартудың жаңа тетігін пайдалана алады.
Freedom Bank жаңалығы жеке тұлғамен шектелмейді
Банк өзін-өзі жұмыспен қамтығандарға арналған толық циклді сервисті де іске қоспақ. Оның ішіне онлайн тіркелу, төлем чегін қалыптастыру, есепті автоматты жіберу және салықты онлайн төлеу кіреді. Төлем қабылдау телефон нөмірі, QR-код, шот ұсыну, өзге карталар мен Apple Pay арқылы жүргізіледі. Мұнда да кэшбэк механизмі қарастырылған: қайтарым сатушыға да, сатып алушыға да беріледі.
Карта дизайнына қатысты бағыт та кеңейіп жатыр. Алғашқы ерекше карталар «Қазақстан темір жолы» ұлттық компаниясының қызметкерлеріне арналады. Freedom Bank пен ҚТЖ арасындағы меморандум бойынша теміржол саласына лайық арнайы дизайн әзірленіп, сол қызметкерлерге Freedom SuperApp ішінде теміржол билеттеріне 20 пайызға дейін кэшбэк ұсынылады. Кейін мұндай формат банкпен жалақы жобасы аясында жұмыс істейтін өзге компанияларға да ашылмақ. Қазір мұндай карталар цифрлық форматта шығарылады.
Банк жаппай аудиторияға арналған дизайн желісін де ұлғайтты. Warner Bros. лицензиясы аясында Harry Potter әлеміндегі балалар картасы ұсынылады. Оны Freedom SuperApp арқылы онлайн ашып, Apple Pay, Google Pay және Samsung Pay әмияндарына қосуға болады. Физикалық нұсқасы кейінірек шығады. Футбол жанкүйеріне арнап Темірлан Анарбеков бейнеленген карта, ал әлемдік футбол көрерменіне Mastercard-пен бірге Лионель Месси суреті бар карта әзірленген.
Бұған дейін банк VISA-мен бірігіп Ламин Ямаль картасын шығарған, қазір оның иесі 400 мыңнан асқан. Форумда блогер Нұрдәулет пен кәсіпкер Руслан Шаекинге қатысты атаулы карта дизайндары да көрсетілді.
Қысқасы, Freedom Bank Freedom Inside алаңын жай таныстырылым емес, клиент экожүйесін қайта құрастыратын үлкен витринаға айналдырды. Банк кэшбэк, ипотека, медицина, контент, сауда және цифрлық сервис бағыттарын бір арнаға тоғыстырып, қосымша ішіндегі өмірді кеңейтуді көздеп отыр. Негізгі сұрақ енді біреу: осы уәденің қай бөлігі нарықта шынымен дүрбелең туғызады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
