Жанармай бағасының өсуіне байланысты көпшілік электромобиль сатып алу мүмкіндігін қарастыруы мүмкін. Электромобильдер жанармайды қажет етпейді, бірақ олардың сенімді қуаттау станцияларының тапшылығы сияқты бірқатар өзекті мәселелері бар. Ал гибридтер екі түрлі қозғалтқыш арасында ауысу арқылы жанармай үнемдейді. Дегенмен тағы бір үшінші балама бар: бұл гибридтің кері нұсқасы саналатын жүріс қоры ұзартылған электромобильдер (EREV), деп хабарлайды Ertenmedia.kz.
EREV технологиясы қалай жұмыс істейді?
EREV (Extended Range Electric Vehicles) – бұл батареяны да, жанармай багын да бірге пайдаланатын электр көлігінің түрі. Дегенмен екі түрлі қуат көзін кезекпен қолданатын дәстүрлі гибридтерден айырмашылығы, EREV арнайы күштік құрылыммен жабдықталған және оның дөңгелектерін тек электр қозғалтқышы ғана қозғалысқа келтіреді. Бастапқыда барлық қуатты батарея береді, ал қуат белгілі бір деңгейден төмендегенде, жанармай қозғалтқышы жүріс қорын арттыру үшін батареяны қуаттауға кіріседі. Мұны жарық сөнгенде қосылатын бензинді генераторға ұқсатуға болады, тек ол тұрмыстық техниканың орнына энергия сақтайтын ірі батареяны қуаттайды.
Электромобильдің жүріс қоры — өте күрделі мәселе, өйткені бір қуаттаумен қанша қашықтықты жүріп өтуге болатынын нақты есептеу оңай емес. Автокөліктің жүріс қашықтығын түрлі әдістермен ұзартуға болады, кейде бұл көрсеткіштер өндіруші уәде еткеннен асып түссе, кейде керісінше жетпей қалады. EREV батареялары көптеген таза электромобильдер мен гибридтерге қарағанда кішірек болғанымен, өндірушілерге байланысты олардың жалпы жүріс қоры 600 мильге (шамамен 965 шақырымға) дейін жетеді.
EREV көліктері алғашқы 120–150 мильді (шамамен 190–240 шақырым) толық батарея зарядымен жүріп өтсе, қалған бүкіл қашықтықты жанармай генераторының қуатымен еңсереді.
EREV үлгілерін кімдер өндіреді?
Электромобильдердің сенімділігі артқан сайын, бұл салаға түрлі көлемдегі көліктерді шығаратын жаңа компаниялар қосыла бастады. EREV технологиясы салыстырмалы түрде жаңа бағыт болып көрінгенімен, оның түп-төркіні бұрыннан белгілі.
Нарыққа шыққан алғашқы нағыз EREV ретінде 2011 жылғы Chevrolet Volt көлігі саналады. Алайда ол уақытта бұл технология кең таныла қоймады және General Motors сұраныс пен табыстың төмендігіне байланысты 2019 жылы Volt өндірісін тоқтатты. Дегенмен қазіргі уақытта технология айтарлықтай дамып, тұтынушылар EREV мүмкіндіктеріне қайта назар аудара бастады. Бір ғана қозғалтқышты жүйе оңтайландыруды жеңілдететіндіктен, EREV кәдімгі гибридтерге қарағанда әлдеқайда үнемді бола алады.
Бүгінде жаңа EREV көліктерін кімдер әзірлеуде? Соның бірі – Scout Motors (Volkswagen еншілес компаниясы), олардың алдағы жол талғамайтын көлігі EV және EREV нұсқаларында: сәйкесінше Traveler және Harvester атауымен шығарылады. Hyundai, Ram, Jeep және Ford сияқты танымал алпауыттар да EREV сатуды жоспарлап отырғанын мәлімдеді, бірақ бұл көліктер нарыққа ең ерте дегенде 2028 жылдан бастап келеді. Айта кетерлігі, өндірушілердің бұл жоспарларында седандар қарастырылмаған — алдағы EREV көліктерінің барлығы дерлік пикаптар мен ірі жол талғамайтын көліктер.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
