Шымкентте Республика күніне арналған «Шымкент сазы» дәстүрлі қазақ өнерінің концерті өтті. Кеш барысында Қазақстанның әр өңіріндегі музыкалық мектептерді танытатын халық әндері мен күйлер орындалды, – деп жазады Ertenmedia.kz.
Концертті тамашалауға Шымкент тұрғындарымен қатар Түркістан облысының көршілес аудандарынан да көрермендер келді. Қонақтар ұлттық шығармаларды жанды дауыста тыңдауға мүмкіндік алды.
Сарыағаш ауданынан келген Зәкира Омарқұлова «Шымкент сазы» концертіне алғаш рет қатысқанын айтты. Оның сөзінше, сахналық қойылымдар мен ұлттық әуендер кешке ерекше әсер берген.
Бағдарлама көрерменді еліміздегі дәстүрлі музыканың түрлі бағытымен таныстыруға арналды. Әрбір шығарма арқылы белгілі бір өңірдің орындаушылық ерекшелігі көрсетілді.
Концертте қазақтың жеті дәстүрлі ән мектебінің өкілдері бір сахнада өнер көрсетті. Сонымен бірге домбыра күйлерінің түрлі орындаушылық бағыттары ұсынылды.
Өнерпаздардың әндері мен күйлерін «Қаратау» этно-фольклорлық ансамблі сүйемелдеді. Ұлттық аспаптардың үндестігі шығармалардың мазмұны мен табиғатын толықтыра түсті.
Әнші Тұрар Темірұлы жобаның бір өңірдің өнерімен шектелмейтінін айтты. Ұжым ән мен күй арқылы Қазақстанның музыкалық мұрасын кеңінен таныстыруды көздейді.
Оның айтуынша, әр аймақта қалыптасқан орындаушылық мектептің өзіндік мақамы мен мәнері бар. Сол ерекшеліктерді бір бағдарламада көрсету ұлттық өнердің байлығын аңғартады.
«Шымкент сазы» жобасының құрылғанына екі жыл болды. Осы аралықта концерттің тұрақты көрермені қалыптасып, бағдарлама қала аумағынан тыс жерлерде де ұсыныла бастады.
Жуырда шымкенттік өнерпаздар Қызылорда қаласында концерт өткізді. Өңір көрермені дәстүрлі әндер мен күйлерге жоғары қызығушылық танытқан.
«Шымкент концерт» ұйымы шығармашылық бөлімінің меңгерушісі Қуанышбек Құттыбайұлының айтуынша, Қызылордадағы сапардан кейін бағдарламаны Шымкент сахнасында қайта ұсыну туралы шешім қабылданған.
Ұйымдастырушылар мұндай концерттер ұлттық музыкалық мұраны сақтауға және оны жас буынға танытуға ықпал ететінін атап өтті. «Шымкент сазы» дәстүрлі өнердің сабақтастығын жалғастыратын тұрақты мәдени жобаға айналып келеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
