Қазақстандық қоғамдық даму институтының сауалнамасына сәйкес, азаматтардың 70,3 пайызы 23 тамызда өтетін Құрылтай депутаттарының сайлауына қатысуды жоспарлап отыр. Зерттеу сайлау науқаны басталған тұста электоралдық таңдау белсенді қалыптасып келе жатқанын көрсетті, – деп жазады Ertenmedia.kz.
Телефон арқылы жүргізілген сауалнама 8-20 шілде аралығында өтіп, оған еліміздің барлық өңірінен 1200 адам қатысты. Іріктеме 18 жастан асқан тұрғындардың жынысы, жасы, тұрғылықты жері мен аймақтық құрамын қамтыған. Қоңыраулар ұялы және стационарлық телефон нөмірлеріне жасалған.
Сауалнамаға қатысқандардың 23,3 пайызы дауыс беруге бармайтынын айтқан. Тағы 6,4 пайыз респондент әзірге нақты шешім қабылдамаған. Қала мен ауыл тұрғындарының сайлауға қатысу ниетіндегі айырмашылық шамамен екі пайыз болған.
Ең жоғары белсенділік 46-60 жас аралығындағы азаматтар арасында байқалған. Олардың дауыс беруге дайындығы 18-28 жастағы жастардан шамамен 10 пайыз жоғары. Әйелдердің сайлауға қатысу ықтималдығы ерлермен салыстырғанда бес пайызға артық болған.
Жоғары және аяқталмаған жоғары білімі бар респонденттер де белсенді топ ретінде көрінген. Зерттеу нәтижесі білім деңгейі өскен сайын саяси процеске қатысу ниеті күшейетінін аңғартады. Дегенмен сауалнама мұның нақты себептерін жеке талдамаған.
Партиялық рейтингте «Әділет» партиясы 64,8 пайыз көрсеткішпен бірінші орынға шыққан. Институт дерегіне сәйкес, саяси ұйым барлық әлеуметтік топта алда тұр, ал оның жақтастары арасында жастар үлесі жоғары. «Ауыл» партиясын респонденттердің 5,4 пайызы қолдауға дайын екенін білдірген.
Respublica партиясының көрсеткіші 4,8 пайыз, ал «Ақ жолдың» нәтижесі 4,7 пайыз болған. Respublica жақтастары арасында қалада тұратын ер азаматтар басым болса, «Ақ жолды» қолдайтындардың дені ауылдағы ересек жас топтарына тиесілі. ЖСДП 3,3 пайыз, Қазақстанның Халық партиясы 3,1 пайыз қолдау жинаған.
«Байтақ» жасылдар партиясына сауалнамаға қатысқандардың 0,8 пайызы дауыс беруге ниетті. «Барлығына қарсы» нұсқасын 2,2 пайыз респондент таңдаған. Тағы 10,9 пайыз азамат партиялық таңдауын анықтамаған немесе жауап беруден бас тартқан.
Зерттеу нәтижесі үгіт кезеңінің басындағы қоғамдық көңіл күйді ғана көрсетеді және дауыс беру қорытындысын алдын ала айқындамайды. Алдағы бір айда партиялардың ақпараттық жұмысы мен сайлаушыларды жұмылдыру қарқыны көрсеткіштерге ықпал етуі мүмкін. Институт сауалнама деректерін Орталық сайлау комиссиясына берілген жазбаша хабарламаға сәйкес жариялаған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
