Қазақстанда 19 қазанда аталып өтетін Құтқарушылар күніне орай Шымкент қаласындағы «Түркістан» сарайында салтанатты іс-шара ұйымдастырылды. Жиында азаматтардың қауіпсіздігі үшін қызмет етіп жүрген сала мамандарына құрмет көрсетілді, – деп жазады Ertenmedia.kz.
Іс-шараға Шымкент қаласының әкімі Ғабит Сыздықбеков, Төтенше жағдайлар департаментінің басшылығы, азаматтық қорғау органдарының қызметкерлері мен ардагерлері қатысты. Салтанатты жиынға құтқарушылардың отбасы мүшелері және мемлекеттік органдардың өкілдері де келді.
Ресми рәсім басталмас бұрын арнайы құтқару техникасы мен заманауи жабдықтардың көрмесі өтті. Қатысушыларға төтенше жағдайлардың алдын алу, өрт сөндіру және апат салдарын жою кезінде қолданылатын құралдар таныстырылды.
Қала әкімі көрмеге қойылған техникаларды аралап, олардың мүмкіндіктерімен танысты. Заманауи жабдықтар құтқарушылардың оқиға орнына жедел жетіп, күрделі жағдайда тиімді әрекет етуіне мүмкіндік береді.
Үздік құтқарушылар марапатталды
Ғабит Сыздықбеков сала мамандарын кәсіби мерекесімен құттықтап, батылдығы мен қызметтік борышына адалдығы үшін алғыс білдірді. Ол құтқарушы мамандығы жоғары кәсібилікті, асқан жауапкершілікті және кез келген сәтте адам өміріне араша түсуге дайын болуды талап ететінін атап өтті.
Салтанатты рәсім барысында бірқатар қызметкерге қала әкімінің Алғыс хаттары табысталды. Қалалық Төтенше жағдайлар департаментінің бастығы Тілеуберді Мәдиев Қазақстан Республикасы Төтенше жағдайлар министрінің құттықтауын жеткізді.
Азаматтық қорғау органдарының ардагерлері мен қызметкерлері медальдармен және Алғыс хаттармен марапатталды. Құрылыс, экономика және бюджеттік жоспарлау басқармаларының сала жұмысын дамытуға үлес қосқан мамандарына да құрмет көрсетілді.
Бірнеше қызметкерге кезекті арнайы атақ берілді. Марапаттау рәсімінен кейін құтқарушылар мен салтанатты жиын қонақтарына мерекелік концерттік бағдарлама ұсынылды.
Құтқару қызметінің инфрақұрылымы жаңартылуда
Шымкент аумағының кеңеюіне байланысты төтенше жағдайлар қызметінің инфрақұрылымын дамытуға ерекше көңіл бөлініп отыр. Қалада жаңа өрт сөндіру деполары салынып, құтқару қызметі, жедел медициналық жәрдем және полиция бөлімшелерін біріктіретін көпфункционалды сервистік орталықтар ашылуда.
Сонымен бірге арнайы техникалар паркі кезең-кезеңімен жаңартылып жатыр. Бұл жұмыстар төтенше жағдайларға әрекет ету уақытын қысқартып, құтқарушылардың мүмкіндігін күшейтуге және қала тұрғындарының қауіпсіздігін қамтамасыз етуге бағытталған.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
