Павлодар облысы жылыту маусымына жылу желілерін жөндеудің кейінгі жылдардағы рекордтық көрсеткішімен кіргелі отыр. Биыл өңірде 48,9 шақырым жылу желісі жаңартылды. Көрсеткіш 2022 жылғы көлемнен төрт еседен астам жоғары, – деп жазады Ertenmedia.kz.
Облыс әкімі Асайын Байханов аппараттық кеңесте жылу электр орталықтары мен инженерлік желілердің дайындығын қарады. Көппәтерлі тұрғын үй қорының дайындығы 98 пайызға жетті. Әлеуметтік нысандар толық дайындалып, бюджеттік ұйымдарға 180 мың тонна көмір қоры жасақталды.
Жаңғырту Энергетикалық және коммуналдық секторларды жаңғырту ұлттық жобасы аясында жүргізілді. Павлодардағы ТМ-20А жылу магистралінің құрылысы аяқталып, Екібастұз бен Ақсуда жеті магистраль қайта жөнделді. Нәтижесінде 900-ден астам көппәтерлі үйдің жылумен қамту сенімділігі артты.
Технологиялық ақаулар саны төрт еседен астам азайды. Ыстық суды тоқтату мерзімі бір айға дейін қысқарып, Павлодар, Екібастұз және Ақсу қалаларына қайта берілді. Қаланы жылуға кезең-кезеңімен қосу желілерге түсетін күрт салмақты төмендетуге тиіс.
Жылу бір күнде емес кезеңмен беріледі
Әлеуметтік нысандарда жылыту маусымын 14 қыркүйектен бастау ұсынылды. Көппәтерлі үйлерді 28 қыркүйек пен 15 қазан аралығында, жеке секторды 15-25 қазанда кезең-кезеңімен қосу жоспарланған. Асайын Байханов Ақсу мен Екібастұзға Павлодардың жылу желілерін біртіндеп толтыру тәжірибесін қолдануды тапсырды.
Мұндай тәсіл жылу жүйелерін гидравликалық реттеуге және инфрақұрылымды баяу қыздыруға мүмкіндік береді. Бір мезетте қосылған мыңдаған нысан құбырлар мен қазандықтарға шамадан тыс күш түсіруі мүмкін. Сондықтан қауіпсіз іске қосу алдағы маусымдағы негізгі міндет ретінде белгіленді.
Электр желілерінде де ауқымды жаңғырту жүріп жатыр. Үш қаржы көзі есебінен 7,4 млрд теңгеге 232,4 шақырым желіні қайта құру және жаңарту көзделген. Бұған қоса 2 393 шақырым электр желісі мен 790 жабдық ағымдағы жөндеумен қамтылып, жоспар 90 пайыздан астам орындалды.
Кеңесте барлық жылу электр орталығының техникалық жағдайы жеке қаралды. Өңір басшысы «Қазақстан алюминийі» акционерлік қоғамының бірінші жылу электр орталығындағы екі қазандықты жөндеу мерзімін нақтылауды талап етті. Павлодар әкіміне стансаға барып, қазандық агрегаттарының дайындығын жеке тексеру тапсырылды.
Вакцинация мен тазалық та назарда
Асайын Байханов жауапты қызметтердің міндеті тұрақты жылу беріп, апат қаупін барынша азайту екенін айтты. Ықтимал ақауларға арналған жедел әрекет жоспары дайын болуы керек. Әсіресе желілерді іске қосу кезіндегі қауіпсіздік бақылауға алынады.
Денсаулық сақтау жүйесінің эпидемиялық маусымға дайындығы да талқыланды. Тұмауға қарсы вакцинация 15 қыркүйекте басталып, халықтың 10 пайызын қамту жоспарланған. Стационарларда 375 төсек дайындалып, қажетті дәрі-дәрмек қоры жасақталды.
Елді мекендерді суық түскенге дейін тазарту үшін 12 қыркүйек пен 12 қазан аралығында «Таза Қазақстан» айлығы өтеді. Облыстық сенбілік 19 қыркүйекке белгіленген. Өңір басшысы тазалық жұмысы бір айлық науқанмен шектелмей, тұрақты жүргізілуге тиіс екенін атап өтті.
Жауапты мекемелерге тұрғындарға жылудың қосылу кестесі мен кезеңдері туралы уақытылы ақпарат беру міндеттелді. Асайын Байханов барлық қызметке алдын ала әрекет етіп, жылыту маусымын тұрақты өткізуді тапсырды. Өңір басшысы жақын арада қысқа дайындық жөнінде тікелей эфир өткізуді жоспарлап отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
