Нұрлан имам деген атпен танымал Нұрлан Байжігітұлы АҚШ астанасы Вашингтонда өткен Ақ үйдің қайырымдылық таңғы асына барды, — деп хабарлайды ErtenMedia.
Имам қандай іс-шараға барды?
Қайырымдылық таңғы асына 2500 адам жиналған. Іс-шарада АҚШ-тың президенті Дональд Трамп та болған.
Имам әлеуметтік желіде осы сапары туралы жазба жариялады.
«Америка Құрама Штатының 45-ші және 47-ші президенті Дональд Трамп мырза қайырымдылық шарада сөз сөйледі. Ең ілері: «Құдайым мені атқан адамға өлтіртпей, сіздердің алдарыңызға шығаруы, бұл — елім үшін сый әрі менің көп дүниелерді жақсы жағына өзгертуіме себеп» деп айтқаны. Бұл сөзін Вашингтонда тап менің алдымда айтқаны маған үлкен әсер берді. Отырған орным да тура алдына түскен екен. Қасымда Армения, Косово, Украина және т.б. мемлекет президенттері отырды. Түйгенім: Еліміздің әрбір азаматы аманатты сезініп, ісіне адал, жүрегі таза, Отанын шынайы сүйіп қызмет етсе, біздің де алға басар қадамдарымыз қарыштайтынына сенімім мол ағайындар…» — деді ол.
Нұрлан имам деген кім?
Нұрлан Байжігітұлы «Нұрлан имам» ретінде танымал, Қазақстандағы белгілі дінтанушы, теолог. Қазір ол Астана қаласындағы «Ырыскелді қажы» мешітінің бас имамы қызметін атқарады.
Нұрлан имам әлеуметтік желілерде белсенді, әсіресе, Instagram парақшасында (@nurlanimam.kz) және YouTube арнасында діни және рухани тақырыптарда видеолар бөлісіп, халық арасында танымалдыққа ие болды.