Өскемен қаласында Өскемен-1 станциясының толық жаңартылған теміржол вокзалы пайдалануға берілді. Салтанатты ашылуға «Самұрық-Қазына» АҚ Басқарма төрағасы Нұрлан Жақыпов, Шығыс Қазақстан облысының әкімі Нұрымбет Сақтағанов және «Қазақстан темір жолы» ҰК» АҚ басшылығы қатысты, – деп жазады Ertenmedia.kz.
Өскемен-1 вокзалының бұрынғы ғимараты 1938 жылы салынған. Техникалық тексеру қорытындысында ескі нысанды толық бұзып, орнына заман талабына сай жаңа ғимарат тұрғызу жөнінде шешім қабылданды. Реконструкция нәтижесінде вокзалдың жалпы аумағы екі еседен астам ұлғайып, 858 шаршы метрден 1,8 мың шаршы метрге жетті.
Жаңа вокзал жолаушылар ағынын тиімді ұйымдастыру, қауіпсіздікті күшейту және қызмет көрсету сапасын арттыру талаптарына сай жобаланған. Инженерлік коммуникациялар толық жаңартылып, перрон реконструкциядан өтті. Ғимаратқа іргелес аумақ та абаттандырылды.
Вокзалда қозғалысы шектеулі жолаушыларға арналған лифтілер, эскалатор, көтергіш платформалар және тактильді навигация қарастырылған. Нысан заманауи бейнебақылау және өрт қауіпсіздігі жүйелерімен жабдықталды. «Самұрық-Қазына» АҚ Басқарма төрағасы Нұрлан Жақыпов жобада қауіпсіздік пен кедергісіз орта қалыптастыруға ерекше көңіл бөлінгенін айтты.
Өскемен-1 станциясы күн сайын 2 мыңнан астам жолаушыға қызмет көрсетеді. Вокзал арқылы 12 жолаушылар пойызы қатынайды. Теміржол бағыттары Өскеменді Астана, Алматы, Аягөз, Жезқазған, Қарағанды және Достықпен байланыстырады.
Реконструкция Президент Қасым-Жомарт Тоқаевтың тапсырмасы бойынша қолға алынған теміржол вокзалдары мен оған іргелес инфрақұрылымды жаңғырту бағдарламасы аясында жүргізілді. Биыл Қазақстан бойынша 124 вокзалдың 121-ін жаңарту жоспарланған. Ауқымды жоба теміржол қызметінің сапасын көтеріп, жолаушыларға жайлы әрі қауіпсіз жағдай қалыптастыруды көздейді.
Жаңарған нысан көлік қолжетімділігін жақсартады
Шығыс Қазақстан облысында бағдарлама аясында бес теміржол вокзалын реконструкциялау белгіленген. Шемонаиха, Риддер, Алтай қалаларындағы және Күмістау станциясындағы төрт нысан бұған дейін пайдалануға берілді. Өскемен-1 вокзалының ашылуымен өңірдегі жаңғырту жұмысының осы кезеңі толық аяқталды.
Облыс әкімі Нұрымбет Сақтағанов жаңа вокзал Шығыс Қазақстанның әлеуметтік-экономикалық дамуында маңызды рөл атқаратынын атап өтті. Оның айтуынша, жаңарған нысан көлік қолжетімділігін жақсартып, облыстың еліміздің өзге өңірлерімен байланысын күшейтеді. Реконструкция өсіп келе жатқан жолаушылар ағынына лайық инфрақұрылым қалыптастырып, қызмет сапасын көтеруге мүмкіндік береді.
Өңір басшысы Өскемен-1 облыс орталығындағы негізгі теміржол қақпасы саналатынын айтты. Күн сайын мыңдаған адам қатынайтын вокзалда заманауи әрі жайлы қызмет ұсыну айрықша мәнге ие. Бір бағдарлама шеңберінде бес вокзалдың жаңартылуы өңірдің көлік инфрақұрылымын жүйелі жаңғыртуға жол ашты.
Жобаны «Қазақстан темір жолы» ҰК» АҚ жүзеге асырды. Реконструкцияға Қазақстан Үкіметі, «Самұрық-Қазына» АҚ, Көлік министрлігі және Шығыс Қазақстан облысының әкімдігі қолдау көрсетті. Жаңарған Өскемен-1 вокзалы енді өңірдің теміржол қозғалысындағы негізгі инфрақұрылымдық торап қызметін атқарады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
