Шығыс Қазақстанда «Заң мен тәртіп» қағидатын жастар арасында ілгерілетуге арналған «Не? Қайда? Қашан?» облыстық турнирі өтті. Зияткерлік додаға 20 команда құрамында 100 жас қатысты, – деп жазады Ertenmedia.kz.
Сайыс Дәулет Серікбаев атындағы Шығыс Қазақстан техникалық университетінің базасында ұйымдастырылды. Іс-шара облыстық ішкі саясат басқармасының жастардың зияткерлік әлеуетін қолдау және дамыту жөніндегі мемлекеттік әлеуметтік тапсырысы аясында өтті. Білім бәйгесіне мектептердің 10-11 сынып оқушылары мен колледждердің I-II курс студенттері қатысты.
Турнир жастардың білімін тексерумен қатар, жауапкершілік, әділдік, өзара құрмет және қоғамдық тәртіп құндылықтарын қалыптастыруды көздеді. «Тәртіпке бағынған құл болмайды» деген Бауыржан Момышұлының сөзі сайыстың негізгі мазмұнымен үндесті. Заңды құрметтеу адамның өз әрекетіне жауапкершілікпен қарауынан басталады.
Қатысушылар түрлі деңгейдегі сұрақтарға жауап беріп, тапқырлығы мен логикалық ойлау қабілетін көрсетті. Әр кезеңде командаларға ақпаратты жылдам талдап, ортақ шешім қабылдау қажет болды. Уақыттың тығыздығы жастардың білімін ғана емес, ұйымшылдығын да сынға салды.
Зияткерлік алаң пікір алмасу, өз ойын дәлелдеу және қарсы көзқарасты құрметтеу мәдениетін дамытуға мүмкіндік берді. «Ақылдасып пішкен тон келте болмас» дегендей, командалық ойын әр қатысушының пікірін ортақ шешімге біріктірді. Мұндай дағдылар белсенді әрі жауапты азамат қалыптастыруда маңызды рөл атқарады.
Тартысты бәсекенің қорытындысында Шәкәрім атындағы №1 орта мектептің «Әділет жастары» командасы жеңімпаз атанды. Жас зияткерлер білім мен жылдамдықты ұштастырып, қарсыластарынан басым түсті. Ұйымдастырушылар жеңімпаздарды құттықтап, барлық қатысушыға белсенділігі үшін алғыс білдірді.
«Заң мен тәртіп» қағидатын қоғамда орнықтыру ортақ жауапкершілікті талап етеді. Ал білімді, саналы және әділдікті бағалайтын жас ұрпақ қауіпсіз қоғамның берік негізін қалайды. Шығыс Қазақстанда жастардың зияткерлік және шығармашылық әлеуетін қолдау жұмысы алдағы уақытта да жалғасады.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
