Астанадағы зейнеткерлерге қазан айының алғашқы күні аталып өтетін Қарттар күніне орай біржолғы төлем түрінде әлеуметтік қолдау көрсетілмек. Қала әкімдігінің дерегінше, шамамен 100 мың зейнеткерге 10 мың теңгеден таратылады, – деп хабарлайды Ertenmedia.kz.
2,5 айлық есептік көрсеткішке тең сома, өткен жылы да дәл осындай көлемде төлем жасалғаны есімізде. Осындай қолдау шарасы елорда қарттарының бір сәтке болса да көңілін көтеріп, мемлекет олардың еңбегін ескеріп отырғанын аңғартады. Қоғамда әлеуметтік теңгерім мен қамқорлықтың болуы – азаматтардың мемлекетке деген сенімін арттыратын фактор.
Ertenmedia.kz порталының Алматы қаласы әкімдікгі қарттарға мұндай қаржылай көмек қарастырылмағанын анықтады. Бірақ әкімдік өкілдері зейнеткерлерге 13 түрлі әлеуметтік қызмет көрсетуде. Мұндай айырмашылық қоғамда түрлі пікір туғызуы мүмкін. Бір қалада қарттар ақшалай қолдау алса, екінші қалада қызмет түрлері ұсынылып отыр. Бұл екі тәсілдің де өзіндік артықшылығы бар. Ақшалай көмек зейнеткердің өз қажеттілігіне жұмсалуына мүмкіндік берсе, қызмет түрлері ұзақмерзімді қолдауды көздейді.
Қарттар күні – жай ғана мереке емес, бұл қоғамның аға буынға деген құрметі мен ізеттілігінің көрсеткіші. Ұзақ жыл еңбек етіп, елдің дамуына үлес қосқан адамдардың еңбегі әрқашан ескеріліп, құрметтелуі тиіс. Зейнеткерлердің әл-ауқатын көтеру, оларға назар аудару – мемлекет дамуының маңызды өлшемдерінің бірі.
Сарапшылардың айтуынша, мұндай төлемдер үлкен мәселені толық шешпесе де, қарт адамдардың күнделікті тұрмысына аз да болса демеу болады. Ең бастысы – бұл қадам олардың қоғамнан шет қалмай, қамқорлық көріп отырғанын сездіреді. Әлеуметтік саясаттың басты мақсаты да – азаматтың еңбегі мен өмірлік жолын бағалау, оған лайықты қолдау көрсету. Сондықтан Астанадағы бұл бастама қоғамда жағымды ықпалын тигізеді.
