Түркістан облысында халықты таза ауыз сумен қамту ісі ең өзекті әлеуметтік мәселенің біріне айналған. Жердің асты да, үсті де бай өлке болғанымен, ауылдағы қарапайым халық үшін ауыз су әрдайым оңайға түскен жоқ. Құдық қазып, судың аз-көптігіне тәуелді болу ауыл тұрмысының шындығы. Енді осы олқылықтың орнын толтыруға бағытталған ірі жобалар қолға алынуда. Соның бірі Мақтаарал ауданына қарасты Атакент кенті мен Өркениет елді мекеніндегі су жүйелерін жаңғырту жұмыстары, – деп хабарлайды Ertenmedia.kz Түркістан облысы әкімінің баспасөз қызметіне сілтеме жасап.
Бұл жобаның құны 3,5 млрд теңгеден асады, соның ішінде республикалық бюджеттен 2,8 млрд теңге бөлінген. Қомақты қаржыға салынған істің сапасы да, уақыты да қатаң бақылануда.
Қазірдің өзінде жұмыстың 65 пайызы орындалып, үлкен нәтиже бар. Тереңдігі 275-280 метрге дейін қазылған екі ұңғыма, сыйымдылығы 1000 м³ болатын су қоймалары, насос станциясы, бақылау пункті және жүздеген метр құбыр тартылды. Бұл – жай қағаз жүзіндегі есеп емес, болашақта мыңдаған адамның тіршілігін жеңілдететін нақты іс. Ауылдың әр үйіне тәулік бойы тұрақты ауыз су жеткізілуі – тек тұрмысқа жайлылық емес, денсаулық пен өмір сапасының кепілі. Су жоқ жерде тұрақтылық болмайды, ал тұрақты су бар жерде еңбек те, береке де болады.
Аудан әкімі Бақыт Асанов та жобаның барысын қадағалап, сапаға айрықша мән беріп отыр. Өйткені, қыруар қаржы жұмсалған істің нәтижесін халық сезінуі тиіс. Атакент пен Өркениет елді мекендері осыған дейін ескі жүйелердің кесірінен қиындық көріп келсе, енді сол мәселе түбегейлі шешілмек. Жоспар бойынша келесі жылдың соңына дейін ауданның барлық тозығы жеткен елді мекендерінде де су жүйелері жаңартылып, проблема толық жабылады.
Бұл жаңалық – жай ғана құрылыс емес, әлеуметтік саясаттың нақты жемісі. Су – әрбір отбасының тіршілігі, балалардың денсаулығы, аналардың уайымсыздығы. Президент тапсырмасының аясында атқарылып жатқан осындай жұмыстар елдің тұрмысын жеңілдетіп қана қоймай, ауылдың келешегіне сенім ұялатады. «Су ішкен құдығыңа түкірме» деген аталы сөздің мәні бүгінгі күні одан да терең. Су бар жерде – өмір бар, ал ол өмірдің сапалы болуы – мемлекет пен халықтың ортақ мақсаты.
