Ғалымдар мидағы белгілі бір аймақтардың зақымдануы темекі мен алкогольге тәуелділікті әлсіретуі мүмкін екенін анықтады. Бұл жаңалық тәуелділік механизмін түсінуге жаңа мүмкіндік беріп отыр, деп жазады Ertenmedia.kz.
Зерттеуге қатысқан адамдардың барлығы темекі шегетін болған. Алайда ми жарақатын алғаннан кейін олардың бір бөлігі бұл әдеттен оңай бас тартса, енді біреулері бұрынғыдай темекі шегуді жалғастырған.
Ғалымдар осы айырмашылықтың себебін анықтау үшін мидағы нақты зақымданған аймақтарды салыстырған. Нәтижесінде темекіні тастаған адамдарда миының белгілі бір бөліктері зақымданғаны белгілі болды.
Атап айтқанда, жоғарғы белдеулі қыртыс, бүйірлік префронтальды қыртыс және аралшық қыртысы деп аталатын аймақтар тәуелділікпен тығыз байланысты екені анықталған. Бұл аймақтар бір-бірімен жүйке байланыстары арқылы байланысып, тәуелділік «тізбегін» құрайды.
Егер осы тізбектің бір бөлігі зақымданса, адамдағы тәуелділік әлсірейді. Яғни темекіге деген құмарлық азаяды. Зерттеу нәтижесі басқа топтағы науқастарда да тексерілген. Бұл жолы ғалымдар дәл осы ми аймақтары алкогольге тәуелділікке де әсер ететінін байқаған.
Бұл дерек маңызды қорытындыға алып келеді. Ғалымдардың пікірінше, аталған ми бөліктері тек темекі немесе алкоголь емес, жалпы тәуелділік механизмінің негізінде болуы мүмкін.
Әдетте мұндай құбылыстар мидағы «сыйақы жүйесімен» байланыстырылып келген. Бұл – адамға ләззат беретін орталықтардың жиынтығы. Бірақ жаңа зерттеу нақты қай аймақтардың негізгі рөл атқаратынын анықтауға көмектесіп отыр.
Ғалымдар әсіресе бүйірлік префронтальды қыртыстың маңызын атап өтеді. Ол басқа тәуелділікке жауап беретін аймақтардың жұмысын реттейді. Бұл жаңалық медицина үшін жаңа бағыт ашуы мүмкін. Енді емдеу тәсілдері осы ми аймақтарына әсер етуге бағытталуы ықтимал.
Мамандар мұндай әсерді арнайы технологиялар арқылы жүзеге асыруға болатынын айтады. Мысалы, транскраниальды магниттік стимуляция немесе әлсіз электр тогымен әсер ету әдістері қолданылуы мүмкін.
Яғни, миды зақымдамай-ақ, оның белсенділігін өзгерту арқылы тәуелділікті әлсіретуге мүмкіндік бар. Бұл зерттеу тәуелділік мәселесіне көзқарасты өзгертіп, оны емдеудің тиімді жолдарын табуға жақындатуы мүмкін.
Күнделікті өмірде қолданылатын кейбір тұрмыстық бұйымдардың құрамындағы химиялық заттар балалардың иммунитетіне кері әсер етуі мүмкін.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
