Apple логотипіндегі «тістелген» із туралы ең көп тараған аңыздың бірі – оның Алан Тьюрингке арналған ишара екен, деп жазады Ertenmedia.kz.
Бұл нұсқа жұртқа әсерлі көрінеді. Себебі Тьюрингтің жанынан жартылай желінген алма табылғаны туралы дерек бар. Соның салдарынан көпшілік Apple белгісіндегі тістелген тұсты дәл осы оқиғамен байланыстырып келді. Алайда шындық әлдеқайда қарапайым.
Apple-дың алғашқы логотипі 1976 жылы мүлде басқа болған. Онда ағаш түбінде отырған Исаак Ньютон бейнеленген. Сол арқылы компания жаңалық ашу, ойлану, серпіліс жасау идеясын көрсеткісі келген. Кейін бұл күрделі суреттен бас тартып, әлдеқайда қарапайым әрі есте тез қалатын белгі қажет болды. Сөйтіп 1977 жылы бәрімізге таныс алма логотипі пайда болды.
Көп жыл бойы осы логотиптің мағынасы төңірегінде түрлі болжам айтылды. Бірі оны Адам ата мен Хауа ана туралы діни сюжетпен байланыстырды. Енді бірі Исаак Ньютонның басына түскен алма туралы аңыздан іздеді. Тағы бір топ Алан Тьюрингке құрмет ретінде жасалған деді. Бірақ логотип авторы Роб Янофф кейін бұл түсіндірулердің көбін жоққа шығарды.
Оның айтуынша, логотиптегі «тістелген» бөлікке тым терең астар іздеудің қажеті жоқ. Бұл белгі алма басқа жеміске ұқсап кетпеуі үшін арнайы қосылған. Егер алма бүтін күйінде салынса, ол шиенің не басқа дөңгелек жемістің сұлбасына ұқсап қалуы мүмкін еді. Сол себепті дизайнер бірден көзге анық алма болып көрінуі үшін кішкентай тістелген із қалдырған.
Яғни ең қарапайым жауап – бұл дизайндық айқындық үшін жасалған шешім. Кейін әріптестері соның ішінде ағылшын тіліндегі «bite» пен «byte» сөздерінің дыбыстық ұқсастығын байқап, оны сәтті ойын деп қабылдаған. Бірақ автордың өзі мұны әдейі ойластырмағанын айтқан. Басқаша айтқанда, технологияға қатысты астар кейін жамалған, ал бастапқы мақсат мүлде қарапайым болған.
Apple атауының өзіне қатысты да көп аңыз бар. Кей адам оны Ньютонмен байланыстырғысы келеді. Алайда Стив Джобс бұл атауды өзі жеміс бағы маңында жүргенде ойлап тапқанын айтқан. Сол сәтте «Apple» сөзі оған жеңіл, жылы, есте тез қалатын атау болып көрінген. Сондықтан мұнда да күрделі философиядан гөрі, интуиция басым болғаны байқалады.
Қысқасы, Apple логотипіндегі «тістелген» іздің сыры көпшілік ойлағандай жұмбақ емес. Ол Алан Тьюрингке де, діни аңызға да, ғылыми символға да тікелей байланып тұрған жоқ. Негізгі себеп – логотипті бірден алма ретінде таныту. Кейде әлемдегі ең әйгілі белгінің артында да күрделі құпия емес, өте қарапайым дизайнерлік шешім тұрады.
Үйдегі Wi-Fi әлсіреуінің себебі кейде күтпеген жерден шығады. Солардың бірі аквариум немесе суға толы үлкен ыдыстар.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
