Қытай әлемдегі ең ірі қалқымалы теңіз жел турбинасын іске қосты. Бүгінде Қытай парниктік газдар шығарындылары бойынша әлемдегі ең ірі елдердің бірі болып қала бергенімен, соңғы жылдары жаңартылатын энергетика саласында ауқымды жобаларды жүзеге асырып келеді. Соның бірі оңтүстік Қытай теңізінде орнатылған жаңа алып жел турбинасы, деп жазады Ertenmedia.kz.
«Үш шатқал» пилоттық жобасы деп аталатын нысанды Қытайдың China Three Gorges Corporation компаниясы салған. Мамандар оны қуаты мен ротор көлемі бойынша әлемдегі ең ірі жұмыс істеп тұрған қалқымалы теңіз жел турбинасы деп бағалап отыр.
Турбинаның қуаты 16 мегаваттқа жетеді. Роторының диаметрі шамамен 253 метрді құрайды, ал қалақтарының ең жоғарғы нүктесі теңіз деңгейінен 270 метрден астам биіктікке көтеріледі.
Жобаның басты ерекшелігі оның теңіз түбіне бекітілмегені. Құрылым арнайы қалқымалы платформаға орнатылған. Ол шамамен 50 метр тереңдікте орналасқан су айдынында жұмыс істейді.
Инженерлердің мәліметінше, турбина биіктігі 20 метрге жуық толқындарға және сағатына 260 шақырымнан асатын желге төтеп бере алады. Бұл көрсеткіш бесінші санаттағы күшті дауыл деңгейіне сәйкес келеді.
Жел энергетикасының жаңа формуласы
Жобаны жүзеге асыру үшін жаңа тұрақтандыру жүйесі әзірленген. Платформа тоғыз арнайы якорь арқылы ұсталып тұр. Сонымен қатар автоматты балласт жүйесі теңіздегі тұрақтылықты қамтамасыз етеді.
Өндірілген электр энергиясы жағалауға 66 киловольттық арнайы кабель арқылы жеткізіледі. Ол теңіз суының коррозиялық әсеріне, температура өзгерісіне және механикалық жүктемелерге төзімді етіп жасалған.
Компанияның болжамынша, турбина жылына шамамен 44,65 гигаватт-сағат электр энергиясын өндіреді. Бұл үш адамнан тұратын 24 мыңға жуық отбасының бір жылдық электр тұтынуын қамтамасыз етуге жетеді.
Сарапшылардың пікірінше, жоба теңіз энергетикасы саласындағы жаңа кезеңнің басталғанын көрсетеді. Бұған дейін теңіздегі жел электр станциялары негізінен таяз суларда орнатылып келген. Ал қалқымалы технология терең теңіз аймақтарын да игеруге мүмкіндік береді.
Қытайлық мамандар бұл жобаны болашақта ірі теңіз жел парктерін салуға арналған тәжірибелік алаң ретінде қарастырып отыр. Егер сынақтар сәтті аяқталса, осындай алып турбиналар әлемнің басқа да терең су аймақтарында кеңінен қолданылуы мүмкін.
Энергетика сарапшылары мұндай технологиялар көмірсутекке тәуелділікті азайтып, жаңартылатын энергия көздерінің үлесін арттыруға ықпал ететінін атап өтуде. Қытайдың жаңа жобасы теңіздегі жел энергетикасының келесі даму бағытын айқындайтын маңызды қадамдардың бірі ретінде бағаланып отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
