Алматының Ақсай шағынауданында бірнеше адамды өлтірген қанішер маньяк жүр деген ақпарат шындыққа жанаспайды, деп хабарлайды Ertenmedia.kz.
Мессенджерлер мен әлеуметтік желілерде белгісіз біреулер қалада қауіпті қылмыскердің пайда болғанын айтып, тұрғындарды сақ болуға шақырған дауыстық жазба таратқан. Қалалық полиция департаменті таралған мәліметтердің жалған екенін ресми түрде мәлімдеп, аудандағы ахуалдың толық бақылауда екенін нақтылады.
Таралған аудиохабарлама және полицияның ұстанымы
Жұртшылық арасында үрей туғызған жазбада Әуезов ауданына қарасты Ақсай шағынауданында қылмыскер жүргені, оның үш адамды өлтіріп, тағы біреуін пышақтап кеткені айтылған еді.
Тәртіп сақшылары халықты дүрліктірген мәліметтің негізсіз екенін жеткізді.
«Таратылып жатқан ақпарат шындыққа сәйкес келмейді. Аудандағы жағдай тұрақты және бақылауда. Қазіргі уақытта жалған хабарламаның авторын анықтап, оны жауапкершілікке тарту бойынша іс-шаралар жүргізіліп жатыр», – деп мәлімдеді қалалық полиция департаменті.
Жалған ақпарат таратқандарға жауапкершілік
Полиция қала тұрғындарын бейтаныс чаттардағы тексерілмеген сыбыстарға сенбеуге және оны таратпауға шақырды. Сондай-ақ тек ресми мәліметтерге сүйену қажеттігін ескертті.
Құқық қорғау органдары қоғамдық тыныштықты бұзып, көрінеу жалған ақпарат таратқан тұлғаларға қатысты заңнамада қатаң қылмыстық жауапкершілік көзделгенін атап өтті.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
