Қазақстан аумағында атмосфералық фронттардың өтуіне байланысты ауа райы күрт өзгеріп, бірқатар өңірде жаңбырдың соңы қарға ұласады. «Қазгидромет» мамандары алдағы күндері еліміздің басым бөлігінде тұман түсіп, көктайғақ болатынын және екпінді жел соғатынын ескертті, деп хабарлайды Ertenmedia.kz.
Мегаполистердегі күн райы: Астана, Алматы және Шымкент
Елордада алдағы күндері жауын-шашынсыз, бірақ салқын ауа райы сақталады. 11 қарашада Астанада көшпелі бұлт шығып, жауын-шашын күтілмейді. Түнде және таңертең қаланы тұман басады. Батыстан, оңтүстік-батыстан соғатын желдің жылдамдығы секундына 2–7 метр болады. Ауа температурасы түнде -5…-7 градусқа дейін төмендесе, күндіз -1…+1 градус шамасында құбылады. 12-13 қараша күндері де осыған ұқсас метеожағдай сақталып, оңтүстік-батыс желінің екпіні секундына 9–14 метрге дейін күшейеді.
Алматыда ауа райы айтарлықтай күрделенеді. Мұнда бұлтты күй орнап, жаңбыр қарға ұласады. Синоптиктер кей уақытта жауын-шашын күшейіп, тұман түсетінін болжап отыр. Желдің жылдамдығы секундына 3–8 метр, кей кездері екпіні 15–20 метрге жетеді. Ауа температурасы түнде де, күндіз де +5…+7 градус болып, күннің екінші жартысында термометр бағаны төмендей береді. 12 қарашаның түнінде жаңбыр мен қар жауып, кейін күн ашылады. Ал 13 қарашада түнгі температура -1…-3 градусқа дейін суытады.
Шымкентте де күн бұлттанып, кей уақытта қар аралас жаңбыр жауады. Тұман түсіп, солтүстік-батыстан соғатын желдің күші секундына 8–13 метрге, екпіні 15–20 метрге дейін барады. Ауа температурасы тәулік бойы +5…+7 градус төңірегінде қалыптасады.
«Алдағы тәуліктерде еліміздің басым бөлігінде ауа райы тұрақсыз сипат алады. Солтүстік циклонның және атмосфералық фронттардың ықпалымен жауын-шашын күшейіп, жолдарда көктайғақ құбылыстары белең алады», – деп хабарлады «Қазгидромет» баспасөз қызметі.
Солтүстік және шығыс аймақтар: аяз бен көктайғақ
Солтүстік Қазақстан, Ақмола, Қостанай және Павлодар облыстарында қыс лебі сезіле бастады. Бұл өңірлерде аздаған қар жауып, жаяу бұрқасын жүреді. Түнгі уақытта термометр бағаны -3…-8 градусқа, ал кейбір аудандарда -10…-13 градусқа дейін төмендейді. Күндіз ауа температурасы -3…+2 градус аралығында болады. Жолдарда көктайғақ қалыптасып, көлік қозғалысына қауіп төндіруі мүмкін.
Шығыс Қазақстан және Абай облыстарында қар түсіп, желдің жылдамдығы 15–20 м/с, ал таулы өңірлерде одан да жоғары екпінге жетеді. Ауа температурасы түнде -5…-12 градусқа дейін түссе, күндіз -2…+3 градусты көрсетеді.
Орталық пен батыс облыстардағы метеожағдай
Қарағанды және Ұлытау облыстарында да ауа райы құбылмалы. Кей жерлерде өткінші қар жауып, тұман түседі. Жел екпіні секундына 15–18 метрге дейін жетуі ықтимал. Түнде сынап бағанасы -4…-9 градусқа төмендеп, күндіз -2…+3 градус шамасында болады.
Батыс Қазақстан, Атырау, Ақтөбе және Маңғыстау облыстарында күн негізінен жауын-шашынсыз өтеді деп болжанады. Батыс өңірлердің солтүстігінде түнгі мезгілде -2…-7 градус суық болса, күндіз ауа +1…+6 градусқа дейін жылынады. Маңғыстау облысының оңтүстігінде күндіз ауа температурасы +8…+13 градусқа дейін көтеріліп, қоңыр салқын ауа райы сақталады.
Оңтүстік және оңтүстік-шығыс: циклон ықпалы
Жамбыл, Түркістан, Қызылорда, Алматы және Жетісу облыстарында оңтүстік циклонының соққысы байқалады. Жаңбыр қарға ұласып, әсіресе таулы аймақтарда мол жауын-шашын түседі. Тұман түсіп, көру қашықтығы нашарлайды.
Таулы және тау бөктеріндегі аудандарда қалың тұман түсіп, екпінді жел мен көктайғақ құбылыстары сақталады.
Бұл өңірлерде түнде ауа температурасы -2…+3 градус аралығында болса, күндіз термометр бағаны +3…+8 градустан аспайды. Синоптиктер мен төтенше жағдайлар мамандары жүргізушілерге жылдамдық режимін сақтап, жазғы дөңгелектерді қысқысына ауыстыруды ескертеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
