Алматы облысы биыл мемлекеттік бюджетке 1,5 трлн теңге салық пен міндетті төлем түсіруді жоспарлап отыр. Бұл өңір тарихындағы ең жоғары қаржылық көрсеткіш болмақ, – деп жазады Ertenmedia.kz.
Былтыр облыс алғаш рет 1,1 трлн теңгеден астам түсім қамтамасыз етті. Соның 490,5 млрд теңгесі республикалық бюджетке аударылды. Жергілікті қазынаға 628,6 млрд теңге түсті.
Өңір қайта құрылғанға дейін Іле мен Қарасай аудандары ғана донор саналған. Қазір тізімге Талғар, Еңбекшіқазақ, Жамбыл аудандары және Қонаев пен Алатау қалалары қосылды. Осылайша донор аумақтар саны 2-ден 7-ге жетті.
Кірістің артуына жаңа өндірістер, инвестициялық жобалар және кәсіпкерліктің дамуы ықпал етті. Облыста KT&G, PepsiCo және «Жетісу Вольфрамдары» жобалары іске қосылды. Іле ауданындағы ФМК мен JTI кәсіпорындары да өндірістік қуатын кеңейтті.
2024 жылы донор аумақтар облыстық бюджетке 276,5 млрд теңге аударды. 2025 жылы түсім көлемі 292,5 млрд теңгеге жетті. Биылғы алғашқы алты айда 241,9 млрд теңге жиналды.
2026 жылға арналған жоспар 542,6 млрд теңге болып белгіленген. Донор аумақтар арасында Іле ауданы көш бастап тұр. Аудан былтыр облыстық бюджетке 249,3 млрд теңге аударған.
Биылғы бірінші жартыжылдықта Іле ауданынан 165,2 млрд теңге түсті. Оның үлесі облыстық бюджет кірісінің 42,4 пайызын құрайды. Мұндай нәтиже аудандағы өндіріс пен іскерлік белсенділіктің ауқымын көрсетеді.
Қазіргі өсім қарқыны сақталса, Алматы облысы 2029 жылы республикалық бюджетке қаржы аударатын донор өңірге айналуы мүмкін. Бұл мәртебе облыстың өз шығынын өзі өтеумен қатар, ел қазынасына үлес қоса алатын деңгейге жеткенін білдіреді. Негізгі міндет өсімді бірнеше ірі кәсіпорынға байламай, шағын және орта бизнес арқылы орнықты ету болмақ.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
