Тері саркоидозына шалдыққан науқастарды брепоцитиниб препаратымен емдеу ауру белгілерін едәуір азайтып, клиникалық тұрғыдан айтарлықтай оң өзгеріс әкелді, деп хабарлайды Ertenmedia.kz.
Аталған нәтижелер Орландо қаласында өткен Америка ревматология колледжінің жыл сайынғы жиыны қарсаңында JAMA Dermatology беделді медициналық журналында жарияланды. Пенсильвания университетіне қарасты Перельман медицина мектебінің маманы Миша Розенбах пен оның әріптестері жаңа дәрінің тиімділігі мен қауіпсіздігін BEACON клиникалық сынағының екінші кезеңінде жан-жақты тексерді.
Клиникалық сынақ қалай өтті?
Зерттеуге тері саркоидозы дертіне шалдыққан 31 ересек пациент қатысты. Науқастар кездейсоқ үш топқа бөлініп, күніне бір рет 45 миллиграмм немесе 15 миллиграмм брепоцитиниб, сондай-ақ плацебо қабылдады.
16 апталық сынақ қорытындысы бойынша екі доза да ауру белсенділігін айтарлықтай төмендеткен. Атап айтқанда, дерттің белсенділігін бағалайтын арнайы CSAMI-A шкаласы бойынша 45 миллиграмм қабылдаған топта көрсеткіш 22,3 тармаққа, ал 15 миллиграмм тобында 22,2 тармаққа жақсарды. Плацебо қабылдағандарда бұл оң өзгеріс небәрі 0,7 тармақты құраған.
«Жарияланған бұл нәтижелер ұзақ уақыт бойы назардан тыс қалып келген ауру мен науқастар үшін нақты клиникалық дәлел ұсынады. Сондай-ақ болашақта емделушілеріміз үшін барынша нысаналы әрі тиімді ем қолжетімді болатынына берік сенім ұялатады», – деді жетекші зерттеуші Миша Розенбах.
Жоғары дозаның тиімділігі мен емдеу мүмкіндігі
Препараттың 45 миллиграмм көлемі теріні тазарту мен ауруды басу көрсеткіштері бойынша әлдеқайда салмақты нәтиже берді. Аталған дозаны ішкен науқастардың 69,2 пайызында тері дерті толықтай немесе дерлік тазарған. Ал плацебо тобында мұндай жағдай мүлдем тіркелмеді.
Сонымен бірге аталған мөлшерді қабылдаған адамдардың 76,9 пайызы терідегі зақымдану белгілерін екі есеге жуық азайтты. Жаңа құрал бұрыннан емделуі аса күрделі саналатын ауыр түрлерге де оң ықпал етіп, науқастардың өмір сүру сапасын арттырған.
Қазіргі уақытта тері саркоидозына қарсы ресми мақұлданған арнайы ем түрі жоқ. Дәрігерлер көбіне гормоналды дәрілерді немесе жанама әсері мол басқа препараттарды қолдануға мәжбүр. Сондықтан жаңа таблетка аталған созылмалы дертке шалдыққан адамдар үшін үлкен үміт сыйлап отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!







