Астанада бүгіннен бастап тұрғын үй кезегінде тұрған азаматтарға жылдық мөлшерлемесі 5 пайыздан аспайтын жеңілдетілген несиемен 562 пәтерге өтінім қабылдау басталды, деп хабарлайды Ertenmedia.kz.
Құжаттар 19 қазанға дейін Baspana Market платформасындағы жеке кабинет арқылы онлайн қабылданады. Жеңілдетілген бағдарлама тұрғын үй кезегіне тіркелген елордалықтарға арналған. Қатысушылардың «Отбасы банкте» шоты және онда таңдаған баспана құнының кемінде 10 пайызы мөлшерінде бастапқы жарнасы жиналуы шарт.
Пәтерлердің орналасуы мен бағасы
Мемлекеттік бағдарлама аясында ұсынылатын баспаналар «Нұрлы жол» теміржол вокзалы маңында, А91 көшесіндегі №36, 36/1, 36/2 және 36/3 үйлерде шоғырланған.
Үлестірілетін тұрғын үй қорының көлемі:
- 166 бір бөлмелі;
- 276 екі бөлмелі;
- 80 үш бөлмелі;
- 40 төрт бөлмелі пәтер.
Тұрғын үйлер таза әрленген, толық дайын күйде тапсырылады. Бір шаршы метрдің бағасы 332 916 теңге болып бекітілген. Ипотекалық қарыздың сыйақы мөлшерлемесі – 5 пайыз, ал жылдық тиімді мөлшерлемесі 5,2–5,8 пайыз аралығында.
Баспананы бөлу тәртібі
Пәтерлерді бөлу барысында жеңілдігі бар топтарға ерекше басымдық беріледі. Баспананың 70 пайызы әлеуметтік осал санаттағы азаматтарға, атап айтқанда I және II топтағы мүгедектігі бар жандарға, көпбалалы отбасылар мен жесірлерге үлестіріледі.
Қордағы пәтерлердің 20 пайызы ата-анасының қамқорлығынсыз қалған балалар мен жетімдерге бөлінген. Қалған баспана көлемі кезекте тұрған өзге азаматтар арасында үлестіріледі. Қатысушыларды іріктеу кезінде өтініш берушілердің баспана кезегіне тіркелген уақыты шешуші рөл атқарады.
Үміткерлерге қойылатын талаптар
Бағдарламаға құжат тапсыру үшін өтініш беруші Қазақстан азаматы болуы, сондай-ақ әкімдіктегі тұрғын үй кезегіндегі мәртебесін құжатпен растауы қажет. Сонымен қатар үміткерлердің соңғы алты айдағы ресми еңбек немесе кәсіпкерлік қызметтен тұрақты табысы болуы тиіс.
Іріктеу қорытындысы бойынша пәтер тиесілі болған азаматтарға жеке хабарлама жолданады. Осыдан соң үміткер барлық талаптар мен қаржылық мүмкіндігін бес жұмыс күні ішінде тиісті орындарға дәлелдеуі керек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
