Арменияның экс-президенті, Кремльмен тығыз байланысты жақтайтын оппозиция жетекшісі Роберт Кочарян сыбайлас жемқорлық ісі аясында ұсталды. Құқық қорғау органдары оның әулеті мен бизнесіне қатысы бар ондаған мекенжайда тінту жүргізіп, үлкен ұлы Седрак Кочарянды да қамауға алды, деп хабарлайды Ertenmedia.kz.
Арменияның жемқорлыққа қарсы комитеті 25 тамызда жүргізілген операция барысында барлығы 6 адамның ұсталғанын ресми растады. Олардың қатарында елді 1998–2008 жылдары басқарған Роберт Кочарян мен оның үлкен ұлы Седрак бар.
Тергеу бұрынғы президент лауазымдық өкілетін теріс пайдаланып, мемлекетке тиесілі құнды мүлікті жалған негіздермен жеке меншікке шығарды деп отыр. Қоғамдық және экономикалық маңызы бар нысандар Кочарянның өзіне, жақындарына немесе солармен байланысты компанияларға нарық бағасынан едәуір арзанға берілген. Кейбір мәміле ашық конкурссыз жасалған.
Кочарянға тоғыз эпизод бойынша айып тағылды
Армения Бас прокуратурасы Роберт Кочарянға қызметтік өкілетін асыра пайдаланды деген үш, аса ірі көлемде пара алды деген екі және қылмыстық жолмен алынған ақшаны заңдастырды деген төрт эпизод бойынша айып таққан.
Қылмыстық қудалау тағы тоғыз адамға қатысты басталды. Олардың арасында Кочарянның ұлы Седракпен бірге Арменияның үшінші президенті Серж Саргсян да бар. Саргсян 25 тамызда Сыбайлас жемқорлыққа қарсы комитетке жеткізіліп, жауап алынғаннан кейін босатылды.
Кочарянның қорғаушылары бұрынғы президенттің заңсыз әрекетке қатысы барын жоққа шығарып, істің саяси астары бар деп санайды.
Кочаряндар әулетінің үйлері мен бизнесі тінтілді
Күштік құрылым қызметкерлері Роберт Кочарянның, оның ұлдары Седрак пен Левонның үйлеріне барған. Операция бірнеше ондаған мекенжайды қамтыды.
Тінту Кочаряндар әулетімен байланысты Toyota орталығында, Orange Fitness спорт кешенінде, Play City ойын-сауық орталығында және бірқатар компания кеңсесінде жүргізілген. Кей нысан мөрленіп, құжаттар мен тергеуге қажет заттар тәркіленді.
Жеке тергеу аясында отбасыға қатысы бар компаниялар мемлекетке шамамен 2,68 миллиард драм немесе 7,3 миллион доллар көлемінде салық шығынын келтірді деген күдік те қарастырылып жатыр. Бірнеше кәсіпорын басшысы ұсталған.
Кочарянның кіші ұлы Левон Армения парламентіндегі «Армения» фракциясының депутаты болғандықтан, оған заң шығарушы орган мүшесінің иммунитеті қолданылады. Ол ұсталмаған.
Экс-президент ауруханаға жеткізілді
Сыбайлас жемқорлыққа қарсы комитетте болған кезде 71 жастағы Роберт Кочарянның қан қысымы көтеріліп, денсаулығы нашарлаған. Оқиға орнына жедел жәрдем шақырылып, бұрынғы президент медициналық орталыққа жеткізілді.
Кочарян кеңсесінің жетекшісі Бағрат Микоян оның жуырда медициналық ем-шарадан өткенін айтты. Дәрігерлер қосымша тексеру қажет деп тапқан. Комитет мәліметінше, сот экс-президентке қатысты бұлтартпау шарасын денсаулығын тексеру аяқталғаннан кейін қарайды.
26 тамызда Кочарянға сотқа жеткізуге негіз болатын жаңа ұстау қаулысы табысталғаны хабарланды. Демек, оның ауруханада жатқаны тергеу әрекетін тоқтатқан жоқ.
Ал Седрак Кочарянды сот екі айға қамауға алды. Қорғаушы тарап шешімге шағым түсіретінін мәлімдеді. Оған әйелі мен балаларынан басқа адамдардың жолығуына шектеу қойылған.
Пашинянмен жанжалдан кейін басталған операция
Кочаряндар отбасына қарсы ауқымды операцияның уақыты саяси пікірталас туғызды. Тінтуден бір күн бұрын премьер-министр Никол Пашинян парламентте Роберт Кочарянның кіші ұлы Левонмен сөзге келген.
Левон Кочарян Үкімет басшысын сот пен құқық қорғау жүйесіне қысым жасап, қарсыластарына іс қозғатты деп айыптаған. Пашинян оған жауап ретінде бұрынғы президенттер тұсында заңсыз иемденілген мүлік мемлекетке қайтарылатынын айтқан.
Арада 24 сағат өтпей Кочаряндар әулетінің үйлері мен кәсіпорындарында тінту басталды. Экс-президенттің жақтастары осы сабақтастықты алға тартып, тергеуді «саяси кек» деп бағалап отыр.
Мәскеуге берілген саяси белгі
Роберт Кочарян Арменияның Кремльмен одақтастығын сақтауды жақтайтын ең ықпалды саясаткердің бірі саналады. Президент болған жылдары ол Мәскеумен «одақтастық серіктестік» туралы декларацияға қол қойып, Ресей капиталының Армения экономикасына кеңінен кіруіне жол ашты.
Кочарянның Владимир Путинмен жеке қарым-қатынасы да бұрыннан белгілі. Ол Пашинян билігінің Ресейден алыстап, Батыспен жақындасу бағытын үнемі сынап келді.
Қазір Кочарян басқаратын «Армения» альянсы парламенттегі екінші ірі саяси күш. Сондықтан экс-президенттің ұсталуы бір отбасының активіне қатысты тергеуден әлдеқайда ауқымды оқиғаға айналып отыр.
Саяси сарапшылар операцияны Пашинян билігінің Ресеймен байланысты бұрынғы элитаға қарсы күресінің жаңа кезеңі деп бағалайды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
