Франция президенті Эммануэль Макрон елдегі соңғы жаппай тәртіпсіздіктерге қатысты пікір білдірген кейбір әлемдік көшбасшыларды сынға алып, олардың мәлімдемелерін «орынсыз әрі ақымақтық» деп бағалады, деп хабарлайды Ertenmedia.kz.
Франция басшысы бұл туралы Доха қаласында өткен баспасөз мәслихатында айтты. Оның сөзінше, шетелдік саясаткерлердің бірқатары Франциядағы күрделі ішкі жағдайды өздерінің саяси науқандары үшін әдейі пайдаланып отыр.
«Франция есебінен ұпай жинау»
Макрон соңғы күндері ел көлемін шарпыған толқуларға сырттан тікелей араласу болмағанын атап өтті. Алайда ақпарат кеңістігінде сыртқы күштер манипуляция жасап, жағдайды ушықтыруға тырысқан.
«Оқиғаларға тікелей сырттан араласу байқалған жоқ. Бірақ шетелден ақпаратты бұрмалау айқын көрінді. Соның салдарынан көптеген адамдар, соның ішінде шетелдік жетекшілер орынсыз әрі тіпті ақымақтық мәлімдемелер жасады», – деді Эммануэль Макрон.
Франция президенті елдің өз қиындықтарын ешкімнің көмегінсіз шешуге қауқарлы екенін мәлімдеді. Шетелдік саясаткерлердің Франция мәселесін өз сайлау алды науқанына таңуын қабылдауға болмайтын әрекет деп есептейтінін жеткізді.
Дезинформация және Трамптың айыптаулары
Франциядағы оқиғаларға қатысты АҚШ саясаткері Дональд Трамп өткір мәлімдеме жасаған еді. Ол наразылықтарды миграция салдарымен байланыстырып, Францияны «мигранттар мен жиһадшылар басып алды» деген сыңайда пікір білдірген.
Макрон бұл тұжырымдарды жоққа шығарып, әлеуметтік желілерде жасанды интеллект көмегімен жасалған жалған бейнежазбалар арқылы қоғамдық пікірді теріс бағытқа бұру әрекеттері жүргенін айтты.
«Кейбіреулер елге мигранттар мен исламшылдардың қалың тобы шабуыл жасады деп түсіндірді. Бұл – шындыққа мүлдем жанаспайтын бос сөз. Осындай жалған хабарламалар біздің мемлекетімізге қарсы бағытталған», – деп атап өтті Франция басшысы.
Наразылықтың нақты себептері
Франция қалаларындағы шерулер бастапқыда өмір сүру құнының қымбаттауы мен әлеуметтік қызметтердің нашарлауына байланысты басталған еді. Көшеге шыққан тұрғындар мен кәсіподақ өкілдерінің басым бөлігі бейбіт митинг өткізуді көздеген.
Дегенмен кейінірек бейбіт шерулерге радикалды топтар қосылып, дүкендер мен ғимараттарды қирату, тәртіп сақшыларымен қақтығысу оқиғалары орын алды. Франция билігі заң бұзған және қарақшылықпен айналысқан әрбір азамат сот алдында жауап беретінін мәлімдеп отыр.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
