Әлеуметтік желіде көлікті қауіпсіздік белдігінсіз және жүргізуші куәлігінсіз тізгіндеп жүргенін айтып, полициядағы «ықпалды таныстарымен» мақтанған алматылық кәсіпкер Ирина Кан сот шешімімен 216 мың теңге көлемінде айыппұл төлейтін болды, деп хабарлайды Ertenmedia.kz. Заңды ашық менсінбеген әйел он тәулікке темір торға қамалуы мүмкін еді, алайда оның кәмелетке толмаған балаларының болуы жазаны жеңілдетті.
«Маған құжатты полковниктер бас иіп әкеледі»
Қоғамдық резонанс тудырған бейнежазба Threads және өзге де әлеуметтік платформаларда кең тарады. Роликте рөлде келе жатқан әйел жол жүру ережелерін ешқашан орындамайтынын, қауіпсіздік белдігін тағуды артық санайтынын және өзіне ешкімнің шамасы жетпейтінін айтып ашық дарақылық танытқан.
Оның сөзінше, ішкі істер органдарындағы шені үлкен қызметкерлер оған тартып алынған куәлігін өздері әкеліп беруге мәжбүр.
«Менің байланыстарым мен мүмкіндіктерімнің қаншалықты зор екенін елестетіп көріңіздерші! Мен сияқты адамға құжаттарды полковниктердің өздері өз қолымен бас иіп әкеліп береді», – деді Ирина Кан желіге таратқан видеосында.
Бейнежазба қоғамда үлкен наразылық туғызып, тұрғындар құқық қорғау органдарынан заңды аяққа таптаған жүргізушіні жауапқа тартуды талап етті.
Желі мониторингі және сот үкімі
Видео желіге шыққан соң қалалық полиция департаменті жедел тексеру жүргізді. Тәртіп сақшылары жүргізушінің 1985 жылы туған азаматша екенін анықтады. Мәліметтерді тексеру барысында оның осыған дейін сот қаулысымен жүргізуші куәлігінен ресми түрде айырылғаны белгілі болды. Жүргізу құқығы жоқ бола тұра рөлге отырған әйелдің көлігі дереу тәркіленіп, мамандандырылған айып тұрағына жабылды.
Әкімшілік құқық бұзушылықтар жөніндегі мамандандырылған ауданаралық соты істі қарап, оған қатысты тиісті шешім қабылдады. Заң бойынша көлік жүргізу құқығынан айырылған адам көлікті қайта басқарған жағдайда 50 айлық есептік көрсеткіш көлемінде айыппұл салынады немесе 10 тәулікке дейін қамауға алынады.
Сот заңбұзушының асырауында жас балалары бар екенін жеңілдететін мән-жай ретінде ескеріп, қамау жазасын қолданбады. Нәтижесінде оған 216 250 теңге көлемінде айыппұл салынды.
Дарақылық пен құқықтық жауапкершілік
Кейінгі жылдары желіде өзінің заңнан жоғары екенін, мемлекеттік органдарда «тіреуі» барын көрсетіп, арзан бедел жинағысы келетін блогерлер мен жүргізушілер жиілеп кетті. Қатардағы қарапайым халықты келеке етіп, полиция формасын киген шенеуніктерді өзіне қызметші етіп көрсетуге тырысу — қоғамдық тәртіпке деген ашық құрметсіздік.
Полиция тексерген сәтте «полковниктер мен генералдардың» да, жасанды әлеуметтік беделдің де заң алдында түкке тұрғысыз болып шығатыны тағы бір мәрте дәлелденді. Алайда куәлігі жоқ жүргізушінің көшеде өзгелердің өміріне қауіп төндіріп, соңында тек ақшалай айыппұлмен ғана құтылып кетуі қоғамда әділеттілікке қатысты жаңа сұрақтар туғызбай қоймайды. «Заң мен тәртіп» қағидаты баршаға ортақ болғанда ғана мұндай дарақылықтың жолы түбегейлі кесілмек.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
