Қазақстанда 20 тамыздан бастап IMEI-коды расталмаған смартфондарды сатуға тыйым салынады. Шектеу Apple, Samsung немесе Xiaomi секілді белгілі бір брендке емес, мемлекеттік жүйеде верификациядан өтпеген әрі елге заңды әкелінгені расталмаған құрылғыларға қатысты, деп хабарлайды Ertenmedia.kz.
Жаңа талаптар 2026 жылғы 19 маусымда қабылданған телекоммуникация нарығын дамыту туралы заңда бекітілген. Негізгі нормалар ресми жарияланған күннен кейін 60 күн өткен соң күшіне енеді.
Енді сатушы телефонды сатып алушыға ұсынбас бұрын оның IMEI-кодын арнайы мемлекеттік базадан тексеруге міндетті. Тексеру кезінде құрылғының верификациядан өткені, бұғатталмағаны және Қазақстанның ұялы байланыс желісінде қолдануға шектеу қойылмағаны анықталады.
Сатушы:
- телефонның барлық IMEI-кодын сатып алушыға төлем жасалғанға дейін көрсетуге;
- кодтарды қағаз немесе электрондық сатып алу құжатында жазуға;
- верификациядан өтпеген құрылғыны сатпауға міндетті.
Талап қарапайым дүкендермен бірге маркетплейстер мен өзге де электрондық сауда алаңдарындағы сатушыларға қолданылады. «Телефонды қазір сатып алыңыз, IMEI-кодын кейін тіркейміз» деген уәде енді заң талабына сай келмейді.
Верификациядан өтпеген смартфон сапасыз тауар деп танылады
Осындай құрылғыны сатып алған азамат сатушыдан ақшасын толық қайтаруды, дәл сондай модельге ауыстыруды немесе бағасын қайта есептей отырып, басқа телефон алуды талап ете алады. Сондай-ақ бағаны төмендету мен ақауды жоюға кеткен шығынды өтеу тәртібі қарастырылған. Талап телефон өндірушісіне немесе байланыс операторына емес, тауарды сатқан дүкенге не кәсіпкерге қойылады.
IMEI-кодты телефоннан *#06# пәрменін теру немесе құрылғы баптауларындағы мәліметті ашу арқылы білуге болады. Екі SIM-карталы смартфонда бірнеше IMEI болуы мүмкін, сондықтан бәрін тексерген жөн. Экрандағы код қорапта және сатып алу құжатында көрсетілген нөмірмен сәйкес келуі керек.
Құрылғының мәртебесін imei.rfs.gov.kz мемлекеттік сервисінен тексеруге болады. Сатушы IMEI-кодты төлемге дейін беруден бас тартса немесе телефон мен қораптағы кодтар сәйкес келмесе, мұндай тауарды сатып алмаған дұрыс.
Жаңа ереже қазір қолданылып жүрген барлық телефон бірден бұғатталады дегенді білдірмейді. Қазақстан базасында бұрыннан тіркелген құрылғылар жұмысын жалғастырады, иесінен қосымша әрекет талап етілмейді.
Сондықтан 20 тамыздағы өзгерістің өзегі телефон үлгісінде емес, оның заңды мәртебесінде жатыр. Бұдан былай проблемалы IMEI-і бар смартфонды өткізу тәуекелі сатып алушының мойнынан сатушының жауапкершілігіне көшеді.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
