Қазақстанда қашықтан көрсетілетін телемедицина қызметтерінің бірыңғай тізбесін бекіту ұсынылды. Денсаулық сақтау министрлігі әзірлеген жоба 2026 жылғы 18 тамызға дейін ашық талқылауда, – деп жазады Ertenmedia.kz.
Құжат 2021 жылдан бері қолданылып келе жатқан қашықтан медициналық қызмет көрсету қағидаларын жаңартуға бағытталған. Жоба қабылданса, онлайн форматта көрсетуге болатын қызметтер мен нәтижесін қашықтан сипаттап, түсіндіруге рұқсат етілетін диагностикалық зерттеулер нақты белгіленеді.
Министрлік телемедицинаның технологиясына, сапасына және қауіпсіздігіне ортақ талап енгізуді көздеп отыр. Мұндай тәртіп медициналық ұйымдардың жұмысын біріздендіріп, дәрігердің пациентті қай жағдайда онлайн қабылдай алатынын айқындайды.
Қашықтан кеңес беру дәстүрлі қабылдауды толық алмастырмайды. Диагноз қою немесе емдеу тәсілін таңдау үшін пациентті тікелей тексеру қажет болса, дәрігер оны емханаға шақырады. Онлайн формат науқастың жағдайын бақылауға, ем нәтижесін бағалауға, зерттеу қорытындысын талдауға және алдағы медициналық тактиканы нақтылауға қолданылады.
Жаңа мүмкіндік әсіресе ауылдар мен шалғай елді мекен тұрғындарына тиімді. Олар облыстық немесе республикалық клиникаға арнайы бармай-ақ, бейінді маманның кеңесін ала алады.
Денсаулық сақтау министрлігінің мәліметінше, телемедицина сервистеріне 655 медициналық ұйым қосылған. Бір миллионнан астам адам онлайн кеңес алып, ықтимал қамту көлемі 2 млн тұрғыннан асты. 2026 жылдың басынан бері 2,17 млн-нан астам медициналық қызмет қашықтан көрсетілген.
Жаңа талаптар жоба бекітіліп, ресми жарияланғаннан кейін ғана күшіне енеді. Сондықтан әзірге кез келген консультацияны немесе зерттеуді толық онлайн өтуге болады деп қабылдауға болмайды.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
