АҚШ президенті Google, Anthropic, Meta, OpenAI және xAI сияқты жасанды интеллект саласындағы жетекші компаниялардың басшыларымен кездесті. Кездесу қорытындысы бойынша ЖИ дамуын бақылау туралы бірлескен келісімге қол қойылды, деп хабарлайды Ertenmedia.kz.
АҚШ президенті Дональд Трамп сейсенбі, 29 қыркүйекте Ақ үйде жасанды интеллект (ЖИ) саласындағы әзірлемелермен айналысатын ірі компаниялардың жетекшілерімен кездесті. Олардың қатарында Google, Anthropic, Meta, OpenAI, Nvidia және биылғы жылдың басында ғарыштық SpaceX компаниясымен біріккен Илон Масктың xAI компаниясы бар. Кездесу қорытындысы бойынша ЖИ дамуына бақылауды күшейту туралы келісімге қол қойылды. Трамп бұл құжатты өзінің Truth Social әлеуметтік желісінде жариялады.
Қол жеткізілген уағдаластықтарға сәйкес, әрбір компания киберқауіпсіздік, биологиялық және химиялық қауіпсіздік секілді бағыттарда ЖИ-модельдерінің мүмкіндіктерін және олардың қауіпсіздік стандарттарына сәйкестігін бақылау үшін «сенімді ішкі тетіктер» құруы тиіс. Анықталған қауіп-қатерлер мен кемшіліктер дер кезінде жойылуы шарт. Сонымен қатар IT-компаниялардан тәуелсіз аудиторлармен бірлесе жұмыс істеу және жасанды интеллект жүйелерінің қауіпсіздік әдістері мен стандарттарын әзірлеуге арналған кездесулерге тұрақты түрде қатысу талап етіледі.
Трамп бұл келісімнің «моральдық күші» бар екенін және сот тәртібімен мәжбүрлеп орындатуға жатпайтынын мәлімдеді. Дегенмен құжатта «уақыт өте келе бұл шараларды заңдар немесе нормативтік актілер деңгейінде бекіту қажеттілігі туындауы мүмкін» екені көрсетілген.
Трамптың оптимизмі және ЖИ сарапшыларының алаңдаушылығы
19 қыркүйекте АҚШ президенті жасанды интеллект мәселелерімен айналысатын арнайы құрылым — «жасанды интеллект күштерінің» құрылатынын жариялаған еді. Бұл ретте Трамп енгізілуін «келесі өнеркәсіптік революция» деп атаған бұл технологияның дамуына кедергі келтірмейтінін білдірді. Ақ үй басшысы АҚШ-тың ЖИ саласында Қытайды басып озуын жалғастыра беруін қалайтынын ерекше атап өтті.
Ал қыркүйектің ортасында Claude, ChatGPT және Gemini жүйелерін жасап шығарған Anthropic, OpenAI және Google компанияларының жетекшілері жасанды интеллектінің даму қарқынын бәсеңдетуді ұсынды. Бұл ЖИ-модельдерінің бақылаудан шығып, сынақ алаңынан интернетке «қашып» кетуі және хакерлік шабуылдар ұйымдастыруы туралы хабарлардың жиілеуі аясында орын алды. Қолда бар деректер бойынша, мұндай оқиғалардың кем дегенде біреуі мемлекеттік құрылымға тікелей әсер еткен.
The New York Times газетінің жазуынша, нарықтың кейбір қатысушылары жетекші IT-компанияларды ЖИ-ден келетін қауіпті асыра көрсетіп отыр деп күдіктенеді. Бұл көзқарасқа сәйкес, ірі ойыншылар осылайша жаңа оқиғалар үшін өз әзірлеушілерінен жауапкершілікті алып тастауға және нарықта картель құруға тырысуда.
📌 Ertenmedia-ның Telegram арнасына жазылыңыз: қысқа әрі нұсқа, ең өзекті ақпарат осында!
